தளபதி பிரபு இயக்கத்தில் உதயநிதி ஸ்டாலின் மற்றும் பார்த்திபன் இணையும் 'பொதுவாக என் மனசு தங்கம்' படத்தின் படப்பிடிப்பு இன்று(செப்.19) முதல் துவங்கியிருக்கிறது.
எழில் இயக்கத்தில் உருவாகும் 'சரவணன் இருக்க பயமேன்' மற்றும் கெளரவ் இயக்கத்தில் உருவாகும் படத்தில் நடித்து வருகிறார் உதயநிதி ஸ்டாலின். 'சரவண இருக்க பயமேன்' படத்தின் படப்பிடிப்பு சுமார் 60% படப்பிடிப்பு முடிவுற்று இருக்கிறது.
இவ்விரண்டு படங்களைத் தொடர்ந்து புதுமுக இயக்குநர் தளபதி பிரபு இயக்கத்தில் உருவாக இருக்கும் படத்தின் படப்பிடிப்பு இன்று முதல் தேனியில் துவங்கப்பட்டு இருக்கிறது. முதற்கட்ட படப்பிடிப்பை சுமார் 23 நாட்கள் நடத்த திட்டமிட்டு இருக்கிறார்கள். இப்படத்துக்கு 'பொதுவாக என் மனசு தங்கம்' என பெயரிட்டு இருக்கிறார்கள்.
இப்படத்தில் உதயநிதி ஸ்டாலினோடு முக்கிய கதாபாத்திரத்தில் நடிக்க ஒப்பந்தமாகி இருக்கிறார் பார்த்திபன். இவர்களோடு சூரி, நிவேதா , மயில்சாமி உள்ளிட்ட பலர் ஒப்பந்தம் செய்யப்பட்டுள்ளார்கள். ஒளிப்பதிவாளராக பாலசுப்பிரமணியம், பாடலாசிரியராக யுகபாரதி, இசையமைப்பாளராக இமான் ஆகியோர் பணியாற்ற இருக்கிறார்கள்.
தேனி படப்பிடிப்பைத் தொடர்ந்து மதுரை, கோவை, சத்தியமங்கலம் உள்ளிட்ட பகுதிகளில் படப்பிடிப்பு நடத்த படக்குழு திட்டமிட்டு இருக்கிறது. 2017ம் ஆண்டின் கோடை விடுமுறைக்கு இப்படத்தை வெளியிட முடிவு செய்திருக்கிறது படக்குழு.