தணிக்கையில் 'யு' சான்றிதழ் கிடைத்ததைத் தொடர்ந்து, ஏப்ரல் 14-ம் தேதி 'கடம்பன்' வெளியாகும் என படக்குழு அறிவிப்பு.
'பெங்களூர் நாட்கள்' படத்துக்குப் பிறகு, ராகவா இயக்கத்தில் உருவான 'கடம்பன்' படத்தில் நடித்து வந்தார் ஆர்யா. கேத்ரீன் தெரசா, சூப்பர் சுப்பராயன் உள்ளிட்ட பலர் நடித்துள்ள இப்படத்தை சூப்பர் குட் பிலிம்ஸ் நிறுவனம் தயாரித்து வருகிறது.
'கடம்பன்' என பெயரிட்டுள்ள இதற்கு யுவன் இசையமைத்து வருகிறார். இப்படத்தின் பெரும்பகுதி காட்சிகளை காட்டுக்குள் படப்பிடிப்பு நடத்தியுள்ளது படக்குழு. சமீபத்தில் வெளியிடப்பட்ட ட்ரெய்லருக்கு பெரும் வரவேற்பு கிடைத்துள்ளது.
இதன் இறுதிக்கட்டப் பணிகள் துரிதமாக நடைபெற்று வந்தன. கிராபிக்ஸ் காட்சிகள் அதிகமாக இருந்ததால் வெளியீடு தாமதமாகி வந்தது. அனைத்து பணிகளும் முடிவுற்று தணிக்கைக்கு விண்ணப்பித்தார்கள். தணிக்கையில் 'யு' சான்றிதழ் கிடைக்கவே, ஏப்ரல் 14-ம் தேதி இப்படம் வெளியாகும் என படக்குழு அதிகாரபூர்வமாக அறிவித்துள்ளது.
தமிழகமெங்கும் இப்படத்தை ஆர்யாவின் 'தி ஷோ பீப்பிள்' நிறுவனம் வெளியிட இருக்கிறது. 'கடம்பன்' படத்தைத் தொடர்ந்து அமீர் இயக்கும் 'சந்தனத்தேவன்' படத்தில் கவனம் செலுத்தி வருகிறார் ஆர்யா.