விஜய் குமார் இயக்கி, நடித்துள்ள ‘உறியடி 2’ படம், ஏப்ரல் 5-ம் தேதி ரிலீஸாகும் என அறிவிக்கப்பட்டுள்ளது.
விஜய் குமார் இயக்கி, நடித்த ‘உறியடி’ படம் பெரும் வரவேற்பைப் பெற்றது. 2016-ம் ஆண்டு மே மாதம் 27-ம் தேதி இந்தப் படம் ரிலீஸானது. இந்தப் படத்தின் வெற்றியால், விஜய் குமார் இயக்கத்தில் அடுத்த படம் என்ன என்பது குறித்து எதிர்பார்ப்பு நிலவியது.
யாரும் எதிர்பாராத விதமாக சூர்யா தயாரிக்க, ‘உறியடி 2’ படத்தை இயக்கினார் விஜய் குமார். இதில் அவரே நாயகனாக நடித்தார். அவருடன் விஸ்மயா, ஷங்கர் தாஸ், அப்பாஸ், ‘மெட்ராஸ் சென்ட்ரல்’ சுதாகர் உள்ளிட்டோர் முக்கியமான கதாபாத்திரங்களில் நடித்தனர்.
குற்றாலம், தென்காசி பகுதிகளில் தொடங்கிய படப்பிடிப்பை, சரியாக 36 நாட்களில் முடித்துள்ளனர். ‘உறியடி’ படத்தைப் போலவே, இதையும் சரியாகத் திட்டமிட்டு விஜய் குமார் முடித்திருப்பது குறிப்பிடத்தக்கது. ‘96’ படத்துக்கு இசையமைத்த கோவிந்த் வசந்தா, இந்தப் படத்துக்கு இசையமைத்துள்ளார். மேலும், சோவ்னீர் புரொடக்ஷன்ஸ் சார்பில் இப்படத்தின் இணை தயாரிப்பாளராகவும் விஜய் குமார் பணிபுரிந்துள்ளார்.
இந்தப் படத்தின் ட்ரெய்லர் மற்றும் இசை வெளியீட்டு விழா, கடந்த 23-ம் தேதி நடைபெற்றது. இந்நிலையில், வருகிற ஏப்ரல் 5-ம் தேதி படம் ரிலீஸாகும் என அதிகாரபூர்வமாக அறிவிக்கப்பட்டுள்ளது.
படத்தைப் பார்த்த சென்சார் போர்டு அதிகாரிகள், படத்துக்கு ‘யு’ சான்றிதழ் அளித்துள்ளனர்.