அருண் விஜய் நடித்துள்ள ‘ரெட்ட தல’ டிசம்பர் 18ம் தேதி வெளியாகும் என படக்குழு அறிவித்துள்ளது.
‘இட்லி கடை’ படத்துக்கு முன்பாக அருண் விஜய் நாயகனாக நடித்து முடித்த படம் ‘ரெட்ட தல’. சரியான வெளியீட்டு தேதிக்காக படக்குழு காத்திருந்தது. தற்போது இப்படம் டிசம்பர் 18ம் தேதி வெளியாகும் என்று படக்குழு அறிவித்திருக்கிறது. இதே தேதியில் தான் பிரதீப் ரங்கநாதன் நடித்துள்ள ‘எல்.ஐ.கே’ படமும் வெளியாகவுள்ளது.
பிடிஜி யுனிவர்சல் நிறுவனத்தின் 3-வது தயாரிப்பாக ‘ரெட்ட தல’ உருவாகி இருக்கிறது. இதனை திருக்குமரன் இயக்கியுள்ளார். ஸ்டைலீஷ் ஆக்ஷன் படமாக இப்படம் உருவாகி இருக்கிறது. இதில் அருண் விஜய் இரண்டு கதாபாத்திரங்களில் நடித்துள்ளார். இதில் அருண் விஜய், சித்தி இத்னானி, தான்யா ரவிச்சந்திரன், ஹரீஷ் பேரடி, யோகேஷ் சாமி, ஜான் விஜய், பாலாஜி முருகதாஸ் உள்ளிட்ட பலர் நடித்துள்ளனர்.
அருண் விஜய் படங்களிலேயே அதிகப் பொருட்செலவில் தயாராகியுள்ள படம் ‘ரெட்ட தல’ என்பது குறிப்பிடத்தக்கது. இதன் ஒளிப்பதிவாளராக டிஜோ டாமி, இசையமைப்பாளராக சாம் சிஎஸ், எடிட்டராக ஆண்டனி ஆகியோர் பணிபுரிந்துள்ளனர்.