பிரபாஸ் நடிக்கும் ‘ஸ்பிரிட்’ படத்தை இயக்கி வருகிறார், சந்தீப் ரெட்டி வங்கா. இதில் த்ரிப்தி திம்ரி நாயகியாக நடிக்கிறார். தென் கொரிய நடிகர் மா டாங்க் சியோக், விவேக் ஓபராய், காஞ்சனா உள்பட பலர் முக்கிய கதாபாத்திரங்களில் நடிக்கின்றனர்.
தெலுங்கு, தமிழ், இந்தி, கொரியா உள்பட 8 மொழிகளில் உருவாகும் இப்படத்தின் படப்பிடிப்பு ஹைதராபாத்தில் செட் அமைத்து நடந்து வருகிறது. இந்நிலையில் இதன் படப்பிடிப்புத் தளத்தில் வியாழக்கிழமை இரவு திடீரென தீ விபத்து ஏற்பட்டது. இதில் பல்வேறு படப்பிடிப்பு உபகரணங்கள் சேதமடைந்தன.
படக்குழுவைச் சேர்ந்த ஒருவருக்கு லேசான காயம் ஏற்பட்டது, அவர் உடனடியாக அருகிலுள்ள மருத்துவமனைக்குக் கொண்டு செல்லப்பட்டார். சம்பவம் நடந்தபோது நடிகர் பிரபாஸ் படப்பிடிப்புத் தளத்தில் இல்லை. இப்படம் அடுத்த ஆண்டு மார்ச் 5ம் தேதி வெளியாக இருப்பதாக அறிவிக்கப்பட்டுள்ளது.