துல்கர் சல்மான் நடித்துள்ள ‘ஐ அம் கேம்’ படத்தை நஹாஸ் ஹிதாயத் இயக்கியுள்ளார். இதில் கயாது லோஹர், கதிர், ஆண்டனி வர்கீஸ், மிஷ்கின், சம்யுக்தா விஸ்வநாதன் உள்ளிட்ட பலர் நடித்துள்ளனர். ஃபேன்டஸி ஆக் ஷன் த்ரில்லர் படமான இதை, துல்கர் சல்மானின் வேஃபரர் பிலிம்ஸ் தயாரித்துள்ளது. மலையாளம், தமிழ், தெலுங்கு, இந்தி உள்பட 5 மொழிகளில் இப்படம் இன்று (செப்.3) வெளியாகிறது. இதன் செய்தியாளர்கள் சந்திப்பு சென்னையில் நடைபெற்றது.
படத்தின் ஹீரோ துல்கர் சல்மான் பேசும்போது, “இந்தப் படத்தில் ஏராளமான தமிழ் நடிகர்கள் நடித்துள்ளதால் தமிழ்ப் படம் போன்ற உணர்வை ரசிகர்களுக்கு ஏற்படுத்தும். எங்கள் நிறுவனம் மிகப்பெரிய பட்ஜெட்டில் தயாரித்துள்ள பிரம்மாண்டமான படம் இது. ஒரு கதையைக் கேட்கும்போது ‘இதை நாம எப்படிப் பண்ணப் போகிறோம்?’ என்ற பயம் வந்தால், அந்தப் படத்தை உடனே ஒப்புக்கொள்வேன்.
இந்தப் படத்தில் மனதளவிலும் உடலளவிலும் கடினமான உழைப்பைக் கொடுத்துள்ளேன். இதன் படப்பிடிப்பு நேரத்தில் இந்த கதாபாத்திரத்துக்குத் தேவையான மனதைரியம் நம்மிடம் இருக்கிறதா? என்று யோசிக்கும் அளவுக்கு இக்கதாபாத்திரம் சவாலாக இருந்தது. இதில் கதிரின் நடிப்பு இயல்பாகவும் தீவிரமாகவும் அமைந்துள்ளது. நம்பகத்தன்மையுடன் நடித்துள்ளார். மிஷ்கின் இந்தப் படத்தின் முக்கியமான அங்கம்.
அவருடைய உற்சாகமும் எனர்ஜியும் இன்றைய இளம் தலைமுறையினரிடமே அரிதாகத்தான் பார்க்க முடியும். சம்யுக்தா விஸ்வநாதனுக்கு இந்தப் படம் முக்கியமான திருப்புமுனையாக அமையும். இது முழுமையான கமர்ஷியல் என்டர்டெய்னராக உருவாகியுள்ளது. இதில் காமெடி, ரொமான்ஸ், மர்மம், சஸ்பென்ஸ், ஆக் ஷன், த்ரில்லிங் மற்றும் கேமிங் என ரசிகர்களை கவரும் பல அம்சங்கள் இடம்பெற்றுள்ளன” என்றார்.