நடிகர் ஷர்வானந்த்
ஷர்வானந்த், டாக்டர் ராஜசேகர், மாளவிகா நாயர், அதுல் குல் கர்னி நடித்துள்ள பான் இந்தியா திரைப்படம், ‘பைக்கர்’. இந்தியாவின் முதல் பைக் ஸ்போர்ட்ஸ் திரைப்படமாக உருவாகியுள்ள இதை அபிலாஷ் ரெட்டி இயக்கியுள்ளார்.
ஜிப்ரான் இசை அமைத்துள்ள இப்படத்துக்கு மதி ஒளிப்பதிவு செய்துள்ளார். யுவி கிரியேஷன்ஸ் சார்பில் விக்ரம் ரெட்டி வழங்க, வம்சி கிருஷ்ணா ரெட்டி மற்றும் பிரமோத் உப்பலபாட்டி தயாரித்து உள்ளனர். ஏப்.3-ல் வெளியாகும் இப்படத்தின் செய்தியாளர்கள் சந்திப்பு சென்னையில் நடந்தது. படக்குழுவினர் கலந்துகொண்டனர்.
நடிகர் ஷர்வானந்த் கூறும்போது, “‘எங்கேயும் எப்போதும்’ முதல் ‘கணம்’ வரை தமிழ் ரசிகர்களுடன் எனக்கு எப்போதும் நெருக்கம் இருந்திருக்கிறது. என் திரைப்பயணத்தைப் பார்த்தால், ஒவ்வொரு படமும் புதிய ஜானரில் அமைந்திருப்பதைக் காணலாம். அதே போல், ‘பைக்கர்’ படமும் என் திரைப்பயணத்தில் முக்கியமான இடத்தைப் பெற்றுள்ளது. என் முழு திரை வாழ்க்கையிலேயே இதுதான் எனது சிறந்த படம் என்று பெருமையுடன் சொல்ல முடிகிறது.
இது இந்திய சினிமாவில் உருவான முதல் ‘மொட்டோகிராஸ்’ (மோட்டார் சைக்கிள் பந்தயம்) திரைப்படம். இந்தப் படம் தொழில்நுட்ப ரீதியாகவும், உணர்ச்சி ரீதியாகவும், பெரிய முயற்சியாக உருவாகியுள்ளது. இந்தக் கதாபாத்திரத்துக்காக 22 கிலோ எடை குறைத்து, 18 வயது இளைஞனாகவும் 30 வயதுள்ளவராகவும் இரு பரிமாணங்களில் என்னை மாற்றிக் கொண்டேன். இது என்னை நடிகராக மட்டும் அல்ல, மனிதராகவும் மாற்றிய திருப்புமுனைப் படமாக அமைந்துள்ளது” என்றார்.