பிரபல ஹாலிவுட் நடிகர் டாம் குரூஸ், உலகம் முழுவதும் ஏராளமான ரசிகர்களைக் கொண்டுள்ளார். மிகவும் ஆபத்தான ஸ்டன்ட் காட்சிகளையும் சாதாரணமாக நடித்து மிரட்டுவார்.
1980களில் அறிமுகமான இவர், ‘டாப் கன்’ உள்ளிட்ட திரைப்படங்களில் நடித்து பிரபலமடைந்தார். இவருடைய ‘மிஷன் இம்பாசிபிள்’ வரிசை படங்களின் மூலம் அதிகமான ரசிகர்களைப் பெற்றார். இவர் நடிப்பில் கடைசியாக ‘மிஷன் இம்பாசிபிள்: த பைனல் ரெக்கனிங்’ படம் வெளியாகி வரவேற்பைப் பெற்றது.
அஸ்கர் பரிந்துரை பட்டியலில் சிலமுறை அவர் பெயர் இடம் பெற்றிருந்தும் அவருக்குச் சிறந்த நடிகருக்கான ஆஸ்கர் விருது இதுவரை கிடைக்கவில்லை. இந்நிலையில் அவருக்கு கவுரவ ஆஸ்கர் விருது, லாஸ் ஏஞ்சல்ஸில்
நடந்த நிகழ்ச்சியில் வழங்கப்பட்டது. மெக்ஸிகன் இயக்குநர் அலெஜாண்ட்ரோ இன்னாரிட்டு கையால் விருதைப் பெற்றார் டாம் குரூஸ்.
பின்னர் பேசிய டாம் குரூஸ், “சினிமா, உலகம் முழுவதும் என்னை அழைத்துச் செல்கிறது. வேறுபாடுகளை மதிக்கக் கற்றுக்கொடுக்கிறது. நமக்கெல்லாம் ஒரே மனிதத் தன்மை இருப்பதை நினைவூட்டுகிறது. ஒரு திரையரங்கில் ஒன்றாகச் சிரிக்கிறோம், உணர்கிறோம், நம்புகிறோம். இதுவே இந்த கலை வடிவத்தின் சக்தி. சினிமா எடுப்பது என் தொழில் மட்டும் அல்ல; அது நான் யார் என்பதையும் காட்டுகிறது.
சின்ன வயதில் இருண்ட திரையரங்கில் அமர்ந்து பெரிய திரையில் விழும் ஒளியைப் பார்த்தபோது, எனக்குள் ஒரு புதிய உலகம் திறந்தது. அது என் சாகசத்துக்கான பசியை, அறிவுக்கான ஆர்வத்தை, உலகத்தைப் புரிந்துகொள்ளும் பேராசையை உருவாக்கியது. அதைப் பின் தொடர்ந்தே இன்று வரை வந்திருக்கிறேன்” என்று தெரிவித்தார்.