மும்பை: ரன்பீர் கபூர் நடிப்பில் ரூ.4,000 கோடி பிரம்மாண்ட பட்ஜெட்டில் உருவாகியுள்ள 'ராமாயணா: பாகம் 1' திரைப்படம் நவம்பர் 5 உலகமெங்கும் வெளியானதைத் தொடர்ந்து, அதன் முதல் நாள் பாக்ஸ் ஆபீஸ் வசூல் விவரங்கள் வெளியாகியுள்ளன.
இந்திய அளவில் மிகவும் எதிர்பார்க்கப்பட்ட இத்திரைப்படம் முதல் நாளில் நல்ல வசூலைப் பெற்றபோதிலும், 2023-இல் பிரபாஸ் நடிப்பில் வெளியான 'ஆதிபுருஷ்' திரைப்படத்தின் முதல் நாள் வசூல் சாதனையை முறியடிக்கத் தவறியுள்ளது.
வர்த்தக இணையதளமான சாக்னில்க் தகவலின்படி, 'ராமாயணா' திரைப்படம் இந்தியாவில் சுமார் 25,200 திரைகளில் வெளியிடப்பட்டு முதல் நாளில் நிகர வசூலாக ரூ.64.85 கோடியை ஈட்டியுள்ளது. இதில் இந்தி மொழியில் ரூ.47.50 கோடியும், கன்னடத்தில் ரூ.7.25 கோடியும், தெலுங்கில் ரூ.6 கோடியும் வசூலாகியுள்ளன. மேலும் தமிழில் ரூ.2.60 கோடியும், மலையாளத்தில் ரூ.1.50 கோடியும் கிடைத்துள்ளன.
வெளிநாடுகளில் ரூ.50 கோடியை ஈட்டியுள்ள நிலையில், இப்படத்தின் மொத்த உலகளாவிய வசூல் ரூ.127.50 கோடியாக உள்ளது. இருப்பினும், படத்தின் தயாரிப்பு நிறுவனம் அதிகாரபூர்வமாக முதல் நாள் உலகளாவிய வசூல் ரூ.155 கோடி எனப் பதிவிட்டுள்ளது.
அதேவேளையில், பிரபாஸ் நடித்த 'ஆதிபுருஷ்' திரைப்படம் தனது முதல் நாளில் இந்திய அளவில் அனைத்து மொழிகளிலும் சேர்த்து ரூ.86.75 கோடி நிகர வசூலும், உலகளவில் ரூ.128.08 கோடி (தயாரிப்பு தரப்பு அறிவிப்புபடி ரூ.140 கோடி) மொத்த வசூலும் செய்திருந்தது.
ரூ.4,000 கோடி பட்ஜெட்டில் உருவான 'ராமாயணா' திரைப்படம், ரூ. 500-700 கோடி பட்ஜெட்டில் எடுக்கப்பட்ட 'ஆதிபுருஷ்' படத்தின் முதல் நாள் வசூலை விடக் குறைவாக ஈட்டியுள்ளதைச் சுட்டிக்காட்டி பிரபாஸ் ரசிகர்கள் இணையத்தில் கருத்து தெரிவித்து வருகின்றனர். பணத்தை மட்டும் முதலீடு செய்வதால் சாதனைகளைப் படைத்துவிட முடியாது என்றும், மக்களின் மனங்களை வெல்ல வேண்டும் என்பதே இதன் மூலம் நிரூபணமாகியுள்ளதாகவும் அவர்கள் பதிவிட்டு வருகின்றனர்.
நிதேஷ் திவாரி இயக்கத்தில் ரன்பீர் கபூர், சாய் பல்லவி , யஷ், ரவி துபே நடித்துள்ள இப்படத்தின் முதல் பாகம் தீபாவளி பண்டிகையை முன்னிட்டு நேற்று வெளியாகியுள்ளது. இதன் இரண்டாம் பாகம் 2028 தீபாவளியை முன்னிட்டு திரைக்கு வரவுள்ளது.