தமிழில் ‘பச்சைக்கிளி முத்துச்சரம்’, ‘பையா’, ‘வித்தகன்’, ‘டாக்டர்’ உள்பட சில படங்களில் நடித்திருப்பவர் மிலிந்த் சோமன். நிகழ்ச்சி ஒன்றில் கலந்து கொண்ட அவர், ஆரோக்கியமாக வாழ்வது பற்றி இந்தியாவில் யாரும் கற்றுக்கொடுப்பதில்லை என்று வருத்தம் தெரிவித்துள்ளார்.
இதுபற்றி அவர் கூறும்போது, “எப்படி ஒரு வேலையை பெறுவது, அலுவலகத்தில் எப்படி வேலை செய்வது என்பது மட்டுமே இங்கு கற்றுக் கொடுக்கப்படுகிறது. ஒரு சமூகமாக இதில்தான் கவனம் செலுத்துகிறோம். வாழ்க்கையில் முக்கியமான 2 விஷயங்கள், ஆரோக்கியமும் மகிழ்ச்சியும். ஆனால், இதைப் பற்றி யாருமே கற்றுக் கொடுப்பதில்லை.
எனது 9 வயது முதல் 23 வயது வரை வாரத்துக்கு சுமார் 65 கி.மீ நீச்சல் பயிற்சி மேற்கொண்டிருந்தேன். தேசிய அளவில் சாம்பியன் பட்டம் வென்றிருக்கிறேன். மாடலிங் துறைக்கு வந்த பிறகு சில காலம் என் பழக்க வழக்கங்கள் திசை மாறின. புகைப்பழக்கத்துக்கும் மது பழக்கத்துக்கும் அடிமையானேன்.
குடித்துவிட்டு வீட்டுக்கு வரும்போது எனது தாயார் வீட்டுக்குள் அனுமதிக்காமல் கண்டித்திருக்கிறார். ஆனால், 25 ஆண்டுகளுக்கு முன்பே புகைப்பழக்கத்தை முழுமையாக நிறுத்திவிட்டேன். மதுப்பழக்கத்தில் இருந்தும் விடுபட முடிந்தது. அந்தச் சூழ்நிலைகள் எனக்கு வாழ்க்கையைக் கற்றுத் தந்த முக்கியமான அனுபவங்களாக அமைந்தன.
‘ஃபிட்னஸ்’ என்றாலே ஆரோக்கியமான உடலைப் பெற உடற்பயிற்சிக் கூடத்துக்கு செல்ல வேண்டிய அவசியமில்லை. அன்றாட வாழ்வில் சுறுசுறுப்பாக இருப்பதும் தினமும் சிறிய உடற்பயிற்சியைத் தொடர்ந்து செய்வதுமே போதுமானது. தினசரி நடப்பது, விளையாடுவது அல்லது எளிய உடல் அசைவுகளில் ஈடுபடுவது அவசியமானது. நீண்டகால ஆரோக்கியத்துக்கு நாம் செய்யும் முறையான தொடர்ச்சியான பழக்க வழக்கங்களே முக்கியம்” என்றார்.