ரன்வீர் சிங் நடிப்பில் வெளியாகி உள்ள பாலிவுட் திரைப்படம் ‘துரந்தர்’. இதில், மாதவன், அக்ஷய் கன்னா, அர்ஜுன் ராம்பால், சஞ்சய் தத், சாரா அர்ஜுன் உள்பட பலர் நடித்துள்ளனர். ‘உரி: தி சர்ஜிகல் ஸ்டிரைக் 2019’ என்ற திரைப்படத்தை இயக்கிய ஆதித்யா தார் இயக்கி உள்ளார்.
ஸ்பை த்ரில்லர் படமான இது, உளவு அதிகாரியை பற்றிய கதயைக் கொண்டது. 1999-ம் ஆண்டு காந்தகாரில் இந்திய விமானம் கடத்தப்பட்டது. அடுத்த 2 ஆண்டுகளில் டெல்லி நாடாளுமன்றத்தின் மீது பயங்கரவாத தாக்குதல் நடத்தப்பட்டது. இதற்குப் பதிலடி கொடுப்பதற்காக, ஹம்சா என்ற பெயரில் பாகிஸ்தானுக்குள் உளவாளியாகச் செல்லும் ரன்வீர் சிங் இந்தியாவுக்கு எதிரான சதித்திட்டங்களைக் கண்டுபிடித்து எப்படி முறியடிக்கிறார் என்பது இதன் கதை.
இந்த மூன்றரை மணி நேரப் படம், வெளியான நாளிலிருந்து அதிக வசூல் ஈட்டி வருகிறது. இப்போது ஆயிரம் கோடி ரூபாய் வசூலை நோக்கிச் சென்று கொண்டிருக்கிறது. இந்தியாவில் மட்டும் இதுவரை ரூ.500 கோடியைத் தொட்டிருக்கிறது. உலகம் முழுவதும் ரூ.730 கோடி வசூலைத் தாண்டியுள்ள இப்படம், இன்னும் சில நாட்களில் ரூ.1000 கோடி வசூலை எட்டும் என்கிறார்கள்.
இந்தாண்டு அதிக வசூல் செய்த பாலிவுட் படங்களில் ‘ஜாவா’வை அடுத்து, ‘துரந்தர்’ படம் இருக்கிறது. ரன்வீர் சிங் நடித்த படங்களில் அதிக வசூல் செய்த படமாகவும் இது உள்ளது.