சென்னை: தொடர்ந்து ஏற்றம் கண்டு அதிர்ச்சி அளித்துவந்த தங்கம் விலை இன்று (டிச.30) ஆறுதல் அளிக்கும் வகையில் குறைந்துள்ளது. சென்னையில் இன்று 22 காரட் ஆபரணத் தங்கம் பவுனுக்கு ரூ.3,360 குறைந்து விற்பனையாகிறது. வெள்ளி விலையும் கணிசமாகக் குறைந்துள்ளது.
சர்வதேச பொருளாதார சூழல், அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில், தங்கத்தின் விலை நிர்ணயிக்கப்படுகிறது. அமெரிக்காவில் இறக்குமதி செய்யப்படும் இந்திய பொருட்களுக்கு 50 சதவீதம் வரி விதிப்பு, அமெரிக்க டாலருக்கு நிகரான இந்திய ரூபாயின் மதிப்பின் தொடர் சரிவு உள்ளிட்ட காரணங்களால், தங்கம் விலை உயர்ந்தும், குறைந்தும் வருகிறது.
அந்த வகையில் கடந்த 15-ம் தேதி 22 காரட் ஆபரணத் தங்கம் ஒரு பவுன் ரூ.1,00,120 என வரலாறு காணாத உச்சம் தொட்டு விற்பனையானது. பின்னர் டிச.28-ல் 1,04,800 என்ற மற்றுமொரு உச்சத்தைத் தொட்டது.
வரும் 2026-ம் ஆண்டு தங்கம் விலை கிராமுக்கு ரூ.15,000 வரை நெருங்கும் என தங்க நகை வியாபாரிகள் கணித்துள்ளனர்.
இந்தச் சூழலில் நேற்று தங்கம் விலை சற்றே குறைந்தது இந்நிலையில், இந்த வாரத்தின் இரண்டாவது நாளாக இன்று சென்னையில் 22 காரட் தங்கத்தின் விலை கிராமுக்கு ரூ.420 குறைந்து, ஒரு கிராம் ரூ.12,600-க்கும், பவுனுக்கு ரூ. 3,360 குறைந்து ஒரு பவுன் ரூ.1,00,800-க்கும் விற்பனை ஆகிறது.
வெள்ளி விலை கிராமுக்கு 23 ரூபாய் குறைந்து ஒரு கிராம் வெள்ளி 281 ரூபாய்க்கும், கட்டி வெள்ளி ஒரு கிலோ ரூ.2 லட்சத்து 58 ஆயிரத்துக்கும் விற்பனை செய்யப்படுகிறது.