சென்னை: 22 காரட் ஆபரணத் தங்கத்தின் விலை இன்று (ஜன.27) சற்று குறைந்துள்ளது. சென்னையில் ஒரு கிராம் தங்கத்தின் விலை ரூ.14,960 ஆக உள்ளது. அதே நேரத்தில் வெள்ளியின் விலை இன்று கிலோவுக்கு ரூ.12,000 உயர்ந்துள்ளது.
உலக அளவில் தங்கத்தை இறக்குமதி செய்யும் நாடுகளில் இந்தியா முன்னணியில் உள்ளது. அதனால் சர்வதேச பொருளாதார மற்றும் அரசியல் சூழல், அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடு அதிகரிப்பு ஆகியவற்றின் அடிப்படையில், தங்கத்தின் விலை நிர்ணயிக்கப்படுகிறது. கடந்த சில மாதங்களாகவே தங்கம் விலை தொடர்ந்து அதிகரித்து வருகிறது.
இந்நிலையில், சென்னையில் 22 காரட் ஆபரணத் தங்கத்தின் விலை இன்று (ஜன.27) கிராமுக்கு ரூ.65 குறைந்து, ஒரு கிராம் ரூ.14,960-க்கு விற்பனை ஆகிறது. பவுனுக்கு ரூ.520 குறைந்து, ஒரு பவுன் ரூ.1,19,680-க்கு விற்பனை ஆகிறது. 24 காரட் சுத்த தங்கம் பவுன் ரூ.1,30,560-க்கும் விற்பனை ஆகிறது. 18 காரட் தங்கம் பவுன் ரூ. 99,800-க்கும் விற்பனை ஆகிறது.
அதே நேரத்தில் வெள்ளியின் விலை இன்று புதிய உச்சத்தை தொட்டுள்ளது. வெள்ளி கிராமுக்கு ரூ.12 உயர்ந்து, ரூ.387-க்கும், கட்டி வெள்ளி கிலோவுக்கு ரூ.12,000 உயர்ந்து, ரூ.3,87,000-க்கும் சந்தையில் விற்பனை ஆகிறது.
அமெரிக்க டாலருக்கு நிகரான ரூபாய் மதிப்பு தற்போது கடும் வீழ்ச்சி கண்டுள்ளது. இத்துடன், சர்வதேச அரசியல் சூழல்களின் எதிரொலியாக தங்கம், வெள்ளி விலையில் பெரும் மாற்றங்கள் ஏற்பட்டு வருகின்றன.