புதுடெல்லி: வரும் நவ.1 முதல் செல்போன்களின் திரையில் அழைப்பவரின் பெயர் இடம் பெற வேண்டும் என செல்போன் நிறுவனங்களுக்கு தொலைத்தொடர்புத் துறை உத்தரவு பிறப்பித்துள்ளது. இந்தியத் தொலைத்தொடர்பு ஒழுங்குமுறை ஆணையம் (டிராய்) 2024 பிப்.23-ம் தேதி சில பரிந்துரைகளை வழங்கியது.
அதில் செல்போன்களின் திரையில் அழைப்பவரின் பெயர் இடம் பெற வேண்டும் என தெரிவிக்கப்பட்டிருந்தது. இதை ஏற்று வரும் நவ.1 முதல் செல்போன்களின் திரையில் அழைப்பவரின் பெயர் இடம் பெற வேண்டும் என செல்போன் நிறுவனங்களுக்கு தொலைத்தொடர்புத் துறை உத்தரவு பிறப்பித்துள்ளது.
இதன்படி, உள்நாட்டிலிருந்து வரும் அனைத்து அழைப்புகளிலும், அழைப்பவரின் தொலைபேசி எண்ணுடன் அவரது பெயரும் திரையில் காட்டப்படும். அழைப்பவரின் எண்ணை, அழைப்பைப் பெறுபவர் தனது தொடர்புப் பட்டியலில் சேமித்து வைத்திருந்தால், சேமித்த பெயர் திரையில் தோன்றும். அந்த எண் சேமிக்கப்படாமல் இருந்தால், அழைப்பவரின் தொலைத்தொடர்பு நிறுவனப் பதிவுகளில் உள்ள பெயர் திரையில் காட்டப்படும்.
வெளிநாட்டிலிருந்து வரும் அழைப்புகளுக்கு, ‘சர்வதேச அழைப்பு’ (International Call) என்ற வாசகம் திரையில் தோன்றும். இந்தப் பெயர் காட்டும் வசதியை அறிமுகப்படுத்துவதற்காக ஏர்டெல், ஜியோ, வோடஃபோன் ஐடியா உள்ளிட்ட தொலைத்தொடர்பு சேவை நிறுவனங்கள் வயர்லெஸ் தொலைத்தொடர்பு வலைப்பின்னல்களில் சோதனைகளை மேற்கொள்ள வேண்டும் என உத்தரவில் தெரிவிக்கப்பட்டுள்ளது.
இந்த வசதி 4ஜி மற்றும் அதற்கும் மேம்பட்ட தலைமுறை வயர்லெஸ் வலைப் பின்னல்களில் செயல்படுத்தப்படும். பின்னர், 2ஜி, 3ஜி, தரைவழித் தொலை பேசி இணைப்புகளுக்கும் இந்த வசதியை விரிவுபடுத்துவது குறித்து அரசு பரிசீலிக்கும்.
இந்த வசதியைச் செயல்படுத்த, ஒவ்வொரு தொலைத்தொடர்பு நிறுவனமும் வாடிக்கையாளர்களின் பெயர்களையும் தொலைபேசி எண்களையும் இணைக்கும் புதுப்பிக்கப்பட்ட தரவுத் தளத்தைப் பராமரிக்க வேண்டும்.
மேலும், அழைப்பின் தரத்தை பாதிக்காத வகையில், பெயர்களை விரைவாகத் தேடிப் பெறுவதற்குத் தேவையான திறனுடன் தங்களது தரவுத் தளங்களும் வலைப் பின்னல்களும் இருப்பதை நிறுவனங்கள் உறுதிசெய்ய வேண்டும்.
யாருடைய பெயர் காட்டாது?
அழைப்பவரின் தொலைபேசி எண்ணை மறைக்கும் வசதியைத் (CLIR-Calling Line Identification Restriction) தேர்ந்தெடுத்துள்ள வாடிக்கையாளர்களின் பெயர்கள் திரையில் காட்டாது.
மேலும், அழைப்பவரின் பெயரைக் காட்டும் வசதி தொடர்பான புகார்களைப் பெறுவதற்கும், குறிப்பிட்ட காலக்கெடுவுக்குள் அவற்றை விசாரித்துத் தீர்வு காண்பதற்கும் தொலைத்தொடர்பு நிறுவனங்கள் உரிய அமைப்பை ஏற்படுத்த வேண்டும் என்றும் அந்த உத்தரவில் தெரிவிக்கப்பட்டுள்ளது.