புதுடெல்லி: நாடு முழுவதும் கடந்த 2025-ம் ஆண்டில் ஒட்டுமொத்த கார்களின் விற்பனை புதிய உச்சமாக 45.5 லட்சத்தை எட்டியுள்ளது.
இதுகுறித்து தொழில் துறை வட்டாரங்கள் கூறியதாவது: கடந்த 2025-ம் ஆண்டு தொடக்கம் இந்திய மோட்டார் வாகனத் துறைக்கு மந்தமாகவே இருந்தது. ஆனால், சரக்கு மற்றும் சேவை வரிக் (ஜிஎஸ்டி 2.0) குறைப்பு காரணமாக ஆண்டின் பிற்பகுதியில் கார் விற்பனை கணிசமாக அதிகரித்தது. சாதனை அளவாக கடந்த 2025-ம் ஆண்டில் பயணிகள் வாகன விற்பனை 45.5 லட்சத்தை எட்டியுள்ளது.
கடந்த 2024-ம் ஆண்டு விற்பனையான 43.05 வாகனங்களுடன் ஒப்பிடுகையில் இது, சுமார் 6 சதவீத வளர்ச்சியாகும்.
கடந்தாண்டு சாதனை விற்பனைக்கு, மாருதி சுசூகி இந்தியா, மஹிந்திரா அண்ட் மஹிந்திரா, டாடா மோட்டார்ஸ், டொயோட்டா, ஸ்கோடா போன்ற நிறுவனங்களின் விற்பனை கணிசமான அளவில் அதிகரித்ததே முக்கிய காரணம்.
கடந்த 2025-ம் ஆண்டில் மாருதி சுசூகி நிறுவனம் 18.44 லட்சம் வாகனங்களையும், டாடா மோட்டார்ஸ் 5.87 லட்சம் வாகனங்களையும், டொயோட்டா 3.88 லட்சம் வாகனங்களையும், ஸ்கோடா 72,665 வாகனங்களையும் விற்பனை செய்துள்ளன.
மாருதி சுசூகி நிறுவனத்துக்கு அடுத்தபடியாக நீண்டகாலமாக வாகன விற்பனையில் ஹூண்டாய் மோட்டார் 2-வது இடத்தில் இருந்து வந்தது. இந்நிலையில், 2025-ல் மஹிந்திரா அண்ட் மஹிந்திரா ஹூண்டாயை பின்னுக்குத் தள்ளி
2-வது இடத்தை பிடித்துள்ளது. டாடா மோட்டார்ஸ் 3-வது இடத்தில் உள்ளது. தென்கொரிய நிறுவனமான ஹுண்டாய் 4-வது இடத்தை பிடித்துள்ளது.
டிசம்பரில் 22% உயர்வு: கார் விற்பனையில் முதலிடத்தில் உள்ள மாருதி சுசூகி நிறுவனத்தின் கார் விற்பனை கடந்த டிசம்பர் மாதத்தில் 22% அதிகரித்துள்ளது. இதுகுறித்து அந்த நிறுவனம் கூறியுள்ளதாவது: கடந்த டிசம்பரில் 2,17,854 கார்கள் விற்பனை செய்யப்பட்டுள்ளன. இது, 2024-ம் ஆண்டின் இதே மாதத்தில் விற்பனையான 1,78,248 கார்களுடன் ஒப்பிடுகையில் 22 சதவீதம் அதிகம் ஆகும். வர்த்தக வாகனம் மற்றும் டொயோட்டா கிர்லோஸ்கருக்கு சப்ளை செய்தவை உட்பட உள்நாட்டு மொத்த வாகன விற்பனை 1,40,829-லிருந்து 1,92,117-ஆக உயர்ந்துள்ளது.
ஆல்டோ. எஸ்-பிரஸ்ஸோ உள்ளிட்ட மினி கார் விற்பனை 7,418-லிருந்து 14,225-ஆக அதிகரித்துள்ளது. பலேனோ, செலிரியோ. டிசையர், இக்னிஸ், ஸ்விப்ட் உள்ளிட்ட காம்பாக்ட் கார் விற்பனை 54,906-லிருந்து 78,704-ஆக உயர்ந்துள்ளது. பிரெஸ்ஸா, எர்டிகா, கிராண்ட் விடாரா, இன்விக்டோ, ஜிம்னி, விக்டோரிஸ் எக்ஸ்எல் 6 உள்ளிட்ட யுடிலிட்டி வாகன விற்பனை 55,561-லிருந்து 73,818-ஆக அதிகரித்துள்ளது. இருப்பினும் கடந்த டிசம்பரில் ஏற்றுமதி 37,419-லிருந்து 25,739-ஆக குறைந்துள்ளது. இவ்வாறு மாருதி நிறுவனம் தெரிவித்துள்ளது.