சென்னை: சென்னையில் ஆபரண தங்கத்தின் விலை நேற்று பவுனுக்கு ரூ.480 உயர்ந்து, ரூ.96 ஆயிரத்துக்கு விற்பனை செய்யப்பட்டது. சர்வதேச பொருளாதார நிலவரத்துக்கு ஏற்ப சமீபகாலமாக தங்கம் விலை தொடர்ந்து உயர்ந்து வருகிறது. அதன்படி, அக்.8-ம் தேதி ஒரு பவுன் தங்கம் ரூ.90 ஆயிரத்தை தாண்டிய நிலையில், அக்.17-ம் தேதி ரூ.97 ஆயிரம் என்ற புதிய உச்சத்தை தொட்டது.
மேலும் அதிகரிக்கும் என எதிர்பார்த்த சூழலில் மறுநாள் பவுனுக்கு ரூ.1,600 சரிந்தது. அதன்பின் அக்.20-ம் தேதி பவுனுக்கு ரூ.640 குறைந்திருந்தது.
இந்நிலையில், சென்னையில் நேற்று கிராமுக்கு ரூ.80-ம், பவுனுக்கு ரூ.480-ம் உயர்ந்து, ஒரு கிராம் ரூ.12 ஆயிரத்துக்கும், ஒரு பவுன் ரூ.96 ஆயிரத்துக்கும் விற்பனையானது. அதேநேரம், வெள்ளி விலை கிராமுக்கு ரூ.2-ம், கிலோவுக்கு ரூ.2 ஆயிரமும் சரிந்து, ஒரு கிராம் ரூ.188-க்கும், ஒரு கிலோ ரூ.1 லட்சத்து 88 ஆயிரத்துக்கும் விற்கப்பட்டது.