புதுக்கோட்டை மாவட்டம் நரிமேடு ராஜீவ்காந்தி நகரைச் சேர்ந்தவர் சந்தோஷ்குமார் (33). இவர் திண்டுக்கல் மாவட்டம் நத்தம் செந்துறையிலிருந்து நேற்று முன்தினம் இரவு கறிக்கோழிகளை மினி லாரியில் ஏற்றிக் கொண்டு புறப்பட்டுள்ளார். இவருடன் உதவியாளர் முருகேசன் மற்றும் சுந்தர்ராஜ் ஆகியோர் வந்துள்ளனர்.
திருச்சி- மதுரை தேசிய நெடுஞ்சாலையில் கைகாட்டி பேருந்து நிறுத்தம் அருகே சாலை ஓரமாக மினி லாரியை நிறுத்தி விட்டு 3 பேரும் தூங்கியுள்ளனர்.
நேற்று அதிகாலையில் சந்தோஷ்குமார் இயற்கை உபாதையை கழிப்பதற்காக நடந்து சென்றுள்ளார். அப்போது அவரை பின்தொடர்ந்து வந்த 4 பேர் சந்தோஷ்குமாரின் கை, கால்களை கட்டி விட்டு, லாரியிலிருந்து ரூ.35 ஆயிரம் பணத்தை எடுத்துக் கொண்டு தப்பிவிட்டனர்.
இதேபோன்று மற்றொரு லாரி ஓட்டுநர் ஒருவரிடமும் ரூ.5 ஆயிரத்தை இந்த கும்பல் பறித்துச் சென்றுள்ளது தெரியவந்தது. இதுகுறித்து போலீஸார் விசாரிக்கின்றனர்.