சட்டப்பேரவை தேர்தல் பிரச்சார த்துக்காக தமிழக முதல்வர் பழனிசாமி நாளை மறுநாள் (பிப்.17) தூத்துக்குடி வருகிறார். அவர் 4 சட்டப்பேரவை தொகுதி களில் 6 இடங்களில் பேசுகிறார்.
முதல்வர் கே.பழனிசாமி தமிழகம் முழுவதும் சுற்றுப்பயணம் மேற்கொண்டு, முதல்கட்ட தேர்தல் பிரச்சாரத்தில் ஈடுபட்டு வருகிறார். அந்த வகையில் தூத்துக்குடி மாவட்டத்தில் உள்ள 6 சட்டப்பேரவை தொகுதிகளிலும் கடந்த ஜனவரி 3, 4 தேதிகளில் முதல்வர் பிரச்சாரம் செய்வதாக அறிவிக்கப்பட்டிருந்தது. ஆனால், ஜனவரி 3-ம் தேதி கோவில்பட்டி, விளாத்திகுளம் ஆகிய இரு தொகுதிகளில் மட்டும் முதல்வர் பிரச்சாரம் செய்தார்.
அவசரமாக சென்னைக்கு செல்ல வேண்டிய நிலை ஏற்பட்டதால், மற்ற நான்கு தொகுதிகளுக்கான பிரச்சாரம் ஒத்தி வைக்கப்பட்டது. இந்நிலையில், அந்த நான்கு தொகுதிகளிலும் முதல்வர் பழனிசாமி வரும் 17-ம் தேதி பிரச்சாரம் செய்கிறார். இதற்காக அன்று காலை 10.15 மணிக்கு விமானம் மூலம் தூத்துக்குடி வரும் முதல்வர், 11 மணிக்கு வைகுண்டம் சட்டப்பேரவை தொகுதிக்கு உட்பட்ட வைகுண்டத்தில் மக்கள் மத்தியில் பேசுகிறார்.
தொடர்ந்து பகல் 12 மணிக்கு திருச்செந்தூரில் மகளிர் குழு வினரை சந்தித்து கலந்துரையாடும் முதல்வர், பகல் 1 மணிக்கு ஆறுமுகநேரியில் மக்கள் மத்தியில் பிரச்சாரம் செய்கிறார். மாலை 5 மணிக்கு ஓட்டப்பிடாரம் தொகுதி புதியம்புத்தூரில் பேசுகிறார். மாலை 6.30 மணிக்கு மாப்பிளையூரணியில் பேசுகிறார். இரவு 7 மணிக்கு தூத்துக்குடியில் நடைபெறும் தேர்தல் பிரச்சார பொதுக்கூட்டத்தில் பங்கேற்கிறார்.
முதல்வர் வருகைக்கான அனைத்து ஏற்பாடுகளையும் அதிமுக தூத்துக்குடி வடக்கு மாவட்டச் செயலாளரான அமைச்சர் கடம்பூர் செ.ராஜூ, தெற்கு மாவட்டச் செயலாளர் எஸ்.பி.சண்முகநாதன் எம்எல்ஏ ஆகியோர் செய்து வருகின்றனர்.