திருச்சி லலிதா ஜூவல்லரி கொள்ளை தொடர்பாக கைது செய்யப்பட்ட சிறையில் இறந்த திருவாரூர் முருகனின் இறப்புச் சான்றிதழ் திருச்சி நீதிமன்றத்தில் நேற்று சமர்ப்பிக்கப்பட்டது.
திருச்சி சத்திரம் பேருந்து நிலையம் அருகே உள்ள லலிதா ஜூவல்லரியில் கடந்த ஆண்டு அக்.2-ம் தேதி ரூ.13 கோடி மதிப்பிலான தங்கம் மற்றும் வைர நகைகள் கொள்ளை போயின.
இது தொடர்பாக திருவாரூரைச் சேர்ந்த முருகன், சுரேஷ், கனகவல்லி, மணிகண்டன், கணேசன் உள்ளிட்ட 5 பேர் கைது செய்யப்பட்டனர். இதில் முக்கிய குற்றவாளியான முருகன் பெங்களூரு சிறையில் அடைக்கப்பட்டிருந்த நிலையில், அண்மையில் உடல் நலக்குறைவு காரணமாக உயிரிழந்தார்.
சுரேஷ் மற்றும் கணேசன் ஆகியோர் திருச்சி மத்திய சிறையில் அடைக்கப்பட்டுள்ளனர்.
கடந்த மாதம் சுரேஷ் உள்ளிட்ட 4 பேருக்கும் குற்றப்பத்திரிகை வழங்கப்பட்டபோது, முருகனின் இறப்புச் சான்றிதழை சமர்ப்பிக்குமாறு நீதிபதி உத்தரவிட்டிருந்தார்.
இதைத் தொடர்ந்து, முருகனின் இறப்புச் சான்றிதழை நேற்று திருச்சி நீதிமன்றத்தில் போலீஸார் சமர்ப்பித்தனர்.