தூத்துக்குடி மாவட்டத்தில் முதல் முறையாக ஊர்க்காவல் படைக்கு 2 திருநங்கைகள் தேர்வு செய்யப்பட்டுள்ளனர். அவர்களுக்கு பணி நியமன ஆணையை எஸ்பி ஜெயக்குமார் வழங்கினார்.
தூத்துக்குடி மாவட்ட ஊர்க்காவல் படைக்கு 40 பேரை தேர்வு செய்வதற்கான நேர்காணல் கடந்த 24-ம்தேதி எஸ்பி தலைமையில் மாவட்ட காவல் அலுவலக மைதானத்தில் நடைபெற்றது. இதில் 100 பெண்கள் உட்பட 695 பேர் கலந்து கொண்டனர். அவர்களுக்கு உயரம், கல்வித் தகுதி, சான்றிதழ் சரிபார்ப்பு மற்றும் நேர்காணல் நடத்தப்பட்டு, 31 ஆண்கள், 7 பெண்கள்,2 திருநங்கைகள் என மொத்தம் 40 பேர் தேர்வு செய்யப்பட்டனர்.
அக்சயா, ஜா ஆகிய 2 திருநங்கைகளும் தூத்துக்குடி மாவட்டத்தில் முதல் முறையாக ஊர்க்காவல் படைக்கு தேர்வு செய்யப்பட்டுள்ளனர். புதிதாக தேர்வு செய்யப்பட்ட 40 பேருக்கும் பணி நியமன ஆணைகளை மாவட்ட எஸ்பி ஜெயக்குமார் நேற்று வழங்கினார்.
பின்னர் செய்தியாளர்களிடம் எஸ்பி கூறியதாவது:
தேர்வு செய்யப்பட்ட 40 பேருக்கும் 45 நாட்கள் பயிற்சிஇன்று (டிச.1) முதல் நடைபெறுகிறது. அதன் பிறகு போக்கு வரத்து ஒழுங்குபடுத்துதல் மற்றும்முக்கிய நிகழ்வுகளின் போது பாதுகாப்பு பணிகளில் ஈடுபடுத்தப்படுவார்கள். இவர்களுக்கு நாளொன்றுக்கு ரூ.560 மதிப்பூதிய அடிப்படையில் மாதத்தில் 5 நாட்கள் பணி வழங்கப்படும்.
மாவட்டத்தில் மணல் கொள்ளையை தடுக்க தொடர்ந்து தீவிர கண்காணிப்பு மேற்கொள்ளப்பட்டு வருகிறது, என்றார்.
நிகழ்ச்சியில் கூடுதல் கண்காணிப்பாளர்கள் கோபி, செல்வன், தூத்துக்குடி ஊர்க்காவல்படை தளவாய் பாலமுருகன், துணை தளவாய் கவுசல்யா உள்ளிட்டோர் கலந்து கொண்டனர்.