தீபாவளி பண்டிகையை கொண்டாட சொந்த ஊர்களுக்கு இளைஞர்கள் மோட்டார் சைக்கிள் மற்றும் கார்களில் சேலம் மாநகரைக் கடந்து சென்றதால், சேலத்தில் வாகன நெரிசல் ஏற்பட்டு போக்குவரத்து ஸ்தம்பித்தது.
நாடு முழுவதும் இன்று தீபாவளி பண்டிகையை மக்கள் சிறப்பாக கொண்டாடுகின்றனர். தீபவாளி பண்டிகை கொண்டாட வெளிமாநிலம், வெளிமாவட்டங்களில் தங்கி பணியாற்றி வரும் இளைஞர்கள் கரோனா தொற்று அச்சத்தால் மோட்டார் சைக்கிளில் கூட்டம் கூட்டமாக சென்றனர். சேலம், கோவை, ஓசூர், பெங்களூரு, சென்னை, கொச்சின் உள்பட பல்வேறு மாவட்டம் மற்றும் வெளி மாநிலங்களில் தமிழக இளைஞர்கள் தங்கி பணியாற்றி வருகின்றனர்.
கடந்த ஏழு மாதமாக கரோனா தொற்று காரணமாக பொது போக்குவரத்து முடக்கப்பட்டது. தற்போது பல்வேறுகட்ட தளர்வுகளுடன் பொது போக்குவரத்து இயக்கப்படுகிறது. ஆனாலும் கரோனா அச்சம் காரணமாக, வெளி மாநிலம், மாவட்டங்களில் பணியாற்றும் இளைஞர்கள் இரண்டு சக்கர வாகனம், கார்கள் மூலம் சொந்த ஊர்களுக்கு திரும்பினர்.
பெங்களூருவில் இருந்து சென்னை, கோவை, திருச்சி, மதுரை செல்பவர்களும், கோவையில் இருந்து சென்னை, திருச்சி, மதுரை செல்பவர்களும் சேலம் மாவட்டத்தை கடந்தே செல்ல வேண்டியுள்ளது. அதேபோல, சென்னையில் இருந்து கோவை, பெங்களூருக்கு செல்பவர்களும் சேலத்தை கடந்து செல்ல வேண்டியுள்ளது. இதனால், நேற்று பகல் 11 மணியில் இருந்து மாநகர பகுதிகளில் மோட்டார் சைக்கிள், கார்களின் எண்ணிக்கை அதிகரித்து, போக்குவரத்தை ஸ்தம்பிக்க வைத்தது.
சேலம் அண்ணாபூங்காவில் இருந்து நான்கு ரோடு, ஐந்து ரோடு செல்லும் மேம்பாலங்களில் vநீண்ட வரிசையில் கார், மோட்டார் சைக்கிள்கள் ஊர்ந்து செல்ல வேண்டிய நிலைக்கு உள்ளானது. அதேபோல, புறவழிச் சாலைகளில் இளைஞர்கள் கூட்டம் கூட்டமாக மோட்டார் சைக்கிளில் உடமைகளை கட்டிக் கொண்டு தீபாவளி கொண்டாட சொந்த ஊர் திரும்பினர். ஒட்டு மொத்தமாக மக்களின் கூட்ட நெரிசல் சாலைகளில் பெருக்கெடுத்ததால், போக்குவரத்தை சீர் செய்ய முடியாமல் போலீஸார் திணறினர்.
மேலும், புதிய ஆடை வாங்கவும், பொருட்கள் வாங்கவும் மக்கள் கூட்டம் கூட்டமாக கடைகளுக்கு சென்றதன் காரணமாக சாலை எங்கும் மக்கள் கூட்டம் அதிகமாக காணப்பட்டது.