அறிவியல்ஸ்கோப் - 11: கூச்ச சுபாவம் கொண்ட விஞ்ஞானி!

விஞ்ஞானி ஒருவர் பணியில் இருந்து ஒரு நாள் வீட்டிற்கு திரும்புகிறார். அப்போது அவரது பணிப்பெண் கையில் துடைப்பத்துடன் நிற்கிறார். இப்படி அவர் நின்றால் என்ன செய்ய வேண்டும். கொஞ்சம் இடம் விடச் சொல்லிவிட்டுப் போகலாம். அல்லது இருக்கும் இடத்தில் செல்லலாம் அல்லவா? ஆனால் அவர் அப்படிச் செய்யவில்லை. உடனே தோட்டத்தின் பக்கமாக ஒரு மாடிப்படியைக் கட்டச் சொன்னாராம். வாசல் வழியாக வந்தால்தானே உங்களை சந்திக்க நேரும். இனிமேல் நான் தோட்டத்து வழியாகவே சென்று வருகிறேன் என்று நினைத்தாராம். இது எப்படி இருக்கு?

அதுபோலவே தான் செல்லும்போது தன்னை சில பெண்கள் பார்த்தார்கள் என்பதற்காக அந்த சாலையையே தவிர்க்கத் தொடங்கினாராம். ஒருமுறை ஆஸ்டிரிய நகரில் இருந்து வந்திருந்த ஒரு பிரமுகர் உங்களைப் பார்க்கத்தான் நான் இந்த நகருக்கே வந்துள்ளேன் என்று இவரைப் பற்றிப் பெருமையாகப் பேச ஆரம்பித்திருக்கிறார். உடனே அந்த இடத்திலிருந்து விருட்டென்று புறப்பட்டாராம் அவர். இவருடன் பேச வேண்டுமானால் அவருடைய முகத்தைப் பார்த்துப் பேசக் கூடாது. மாறாக நாம் ஒரு வெற்றிடத்தை நோக்கிப் பேசுகிறோம் என்று பேசினால்தான் உண்டு என்றாராம் டாக்டர் ஒலஸ்டன் என்று ஒரு அறிஞர். இவ்வாறு கூச்சமான இயல்புடையவராக இருந்தவர் வேறு யாருமல்லர். ஹென்றி கேவண்டிஷ் (1731-1810) அவர்கள்தான். உண்மையில் இவர் இவ்வளவு கூச்ச இயல்புடையவராக இருந்தாலும் அவர் பல அரிய கண்டுபிடிப்புகளுக்குச் சொந்தக்காரர்.