கனியும் கணிதம் 51: உடல் எடையும் உறுப்புகள் எடையும்

உடலின் உயரத்தை மீட்டர்/சென்டிமீட்டரில் அளந்துவிட்டோம். கைவசம் நம்மிடம் இருக்கும் அளவுகோள் வைத்து எப்படியோ சமாளித்துவிட்டோம். அரை அடி ஸ்கேல் வைத்தும்கூட ஒரு சுவரில் 200 சென்டி மீட்டர் வரையில் உயரத்தை வரைந்து அளக்கலாம். ஆனால் எடையை எப்படி அளப்பது? எடை அளக்கும் கருவிகளை எங்கெல்லாம் பார்த்துள்ளீர்கள்? மளிகைக் கடைகளில், காய்கறி கடைகளில், இறைச்சிக் கடைகளில், மருத்துவமனைகளில் எடை அளக்கும் கருவிகளைப் பார்த்திருக்கலாம்.

ஒவ்வொரு இடத்திலும் அளவுகள் மாறும். துல்லியத்தன்மையும் மாறும். எல்லா இடங்களிலும் இப் போது பெரும்பாலும் டிஜிட்டல் எடைக்கருவிகள் வந்துவிட்டன. நம் உடல் எடையை எப்படி அளப்பது? அதற்கு மருத்துவமனைகளில் பார்த்த கருவிகள்தான். சரி மொத்த உடல் எடையையும் அளந்தாச்சு, இதில் இதயத்தின் எடை எவ்வளவு? இதர உறுப்புகளின் எடை எவ்வளவு? அதை எப்படி அளந்து சொல்கின்றனர்? எடைக்கான அளவீடு கிலோ கிராம் என நன்றாகத் தெரியும்.