தமிழக முதல்வருக்கு 5,000 இ-தந்தி அனுப்பிய வணிகர்கள் :

தமிழகத்தில் அனைத்து கடைகளை பிற்பகல் 2 மணி வரை திறக்க அனுமதி வழங்கக் கோரி வேலூர் அனைத்து வணிகர்கள் சார்பில் தமிழக முதல்வருக்கு 5 ஆயிரம் இ-தந்தி அனுப்பப்பட்டது.

தமிழகத்தில் கரோனா தொற்று பாதிப்பு குறைந்த 27 மாவட்டங்களில் மட்டும் தளர்வுகளுடன் கூடிய ஊரடங்கு அமலுக்கு வந்துள்ளது. இதில், சிறு மற்றும் குறு தொழில் நிறுவனங்கள் மற்றும் அனைத்து வகையான கடைகளை பிற்பகல் 2 மணி வரை அனுமதிக்க வேண்டும் என வேலூர் அனைத்து வணிகர் சங்கங்கள் சார்பில் கோரிக்கை வைக்கப்பட்டுள்ளது.

இதை வலியுறுத்தி தமிழக முதல்வருக்கு இ-தந்தி அனுப்பும் போராட்டம் நடத்த முடிவு செய்தனர். அதன்படி, வேலூர் அண்ணா சாலையில் உள்ள தலைமை தபால் நிலையத்தில் இருந்து தமிழக முதல்வருக்கு 5 ஆயிரம் இ-தந்திகளை வணிகர்கள் நேற்று அனுப்பி வைத்தனர். இதில், வேலூர் அனைத்து வணிகர்கள் சங்கங்களின் பேரமைப்பின் மாவட்டத் தலைவர் ஞானவேலு, மாவட்ட துணைத் தலைவர் ரமேஷ் குமார், மாவட்டச் செயலாளர் ஏ.வி.எம்.குமார், பொருளாளர் அருண்பிரசாத், நகரச் செயலாளர் பாபு அசோகன் உள்ளிட்டோர் பங்கேற்றனர்.