புதுச்சேரியில் ரங்கசாமி தலைமையில் புதிய அரசு பதவியேற்க உள்ள நிலையில், பதவியேற்பு விழாவுக்காக சட்டப்பேரவை தூய்மைப்படுத்தப்பட்டு, தயாராகி வருகிறது.
புதுச்சேரியில் மொத்தமுள்ள 30 தொகுதிகளில், என்.ஆர்.காங்கிரஸ் 10 இடங்களிலும், பாஜக6 இடங்களிலும் வெற்றி பெற்றுள்ளன. காங்கிரஸ் 2 இடங்களிலும், திமுக 6 தொகுதியிலும், சுயேச்சைகள் 6 தொகுதியிலும் வெற்றி பெற்றுள்ளனர்.
16 இடங்களில் வெற்றி பெற்றுள்ள என்.ஆர் காங்கிரஸ்-பாஜக கூட்டணி ஆட்சி அமைக்க உள்ளது. இதனிடையே, புதுச்சேரியின் 14-வது சட்டப்பேரவை, துணை நிலை ஆளுநரின் ஆணைப்படி மே.3-ம் தேதி கலைக்கப்பட்டதாக புதுச்சேரி சட்டப் பேரவைச் செயலகத்தின் செயலர் முனிசாமி அதிகாரப்பூர்வ தகவலை வெளியிட்டுள்ளார். இதைத் தொடர்ந்து புதுச்சேரி மாநிலத்தின் 15-வது சட்டப் பேரவை, ரங்கசாமி தலைமையில் அமைய உள்ளது.
என்.ஆர்.காங்கிரஸ் கட்சி தரப்பில் ரங்கசாமி முதல்வராகிறார். முன்னாள் அமைச்சர்கள் 4 பேரில்இருவருக்கு அமைச்சர் பதவியும்,ஒருவர் சட்டப்பேரவைத் தலைவராகவும் தேர்வு செய்யப்படலாம் என கூறப்படுகிறது.
பாஜக தரப்பில் முன்னாள் அமைச்சர், முன்னாள் எம்எல்ஏ மற்றும் கட்சி பொறுப்பில் இருக்கும் ஒருவர் ஆகிய 3 பேரில் இருந்து 2 அமைச்சர் பதவியும், ஒருவருக்கு சட்டப்பேரவைத் துணைத் தலைவர் பதவியும் வழங்கப்படலாம் என பேசப்பட்டு வருகிறது.
ரங்கசாமி தலைமையில் புதிய அமைச்சரவை பதவி ஏற்பு விழா மே 7 அல்லது 9-ம் தேதிகளில் நடைபெற உள்ளதாகத் தகவல் வெளியாகி உள்ளது. இதற்காக சட்டப்பேரவை வளாகத்தில் உள்ள அறைகளை சுத்தம் செய்யும் பணிகள் தீவிரமாக நடைபெற்று வருகின்றன.