உறுதியில் சங்கமித்த சஞ்சய்யும் அரிஃபுல்லாவும்!

சிகரத்தின் உச்சியை நோக்கிப் பயணிப்பவராக இருந்தாலும், கடலின் ஆழத்தில் முத்துக்குளிப்பவராக இருந்தாலும், இறை எனும் பரவச அனுபவத்துக்காக உள்ளொளியை நோக்கித் தவமிருப்பவராக இருந்தாலும் இவர்கள் எல்லாரிடமும் இருக்கும் பொதுவான அம்சம் உறுதி!

தெய்வத்தான் ஆகாதெனினும் முயற்சி செய்வதால் முடியும் என்கிறார் திருவள்ளுவர். இலக்கை அடையும்வரை தொடர்ந்து போராடு என்கிறார் சுவாமி விவேகானந்தர். அப்படிப்பட்ட உறுதியை கருப்பொருளாகக் கொண்டு உருவான பாடலை, புகழ்பெற்ற கர்னாடக இசைப் பாடகர் சஞ்சய் சுப்ரமணியத்தையும் புகழ் பெற்ற சூஃபி இசைப் பாடகர் அரிஃபுல்லா ஷா ரஃபியையும் பாடவைத்து யூடியூபில் வெளியிட்டுள்ளது கோக் தமிழ் ஸ்டுடியோ.