உலக வங்கியின் வருமான ஏற்றத்தாழ்வு மதிப்பீடு சரியா?

இந்தியாவின் வருமான ஏற்றத்தாழ்வு குறித்து உலக வங்கி அண்மையில் வெளியிட்டுள்ள அறிக்கை, கொள்கை முடிவு எடுக்கும் வட்டாரங்களில் மட்டுமல்லாமல், ஆராய்ச்சியாளர்கள், ஊடகங்கள், அரசியல் விமர்சகர்கள் மத்தியிலும் பெரிய புயலைக் கிளப்பியுள்ளது.

இந்திய அரசின் பத்திரிகைத் தகவல் அலுவலகம் (Press Information Bureau-PIB) உலக வங்கியின் கண்டறிதல்களை எடுத்துரைக்கும் ஒரு விரிவான குறிப்பை வெளியிட்டுத் தவறான புரிதல்களைத் தெளிவுபடுத்த முயன்றது. இருப்பினும், இந்த மதிப்பீடுகளின் நம்பகத்தன்மை குறித்து ஆய்வாளர்கள் பெரும் சந்தேகம் எழுப்பி, உலக வங்கியின் தரவுகள் மிகைப்படுத்தப்பட்டவை என்று குறிப்பிட்டுள்ளனர்.

மறு​புறம், இத்தர​வுகள் அண்மையில் இந்தியாவின் நிதி ஆயோக் (NITI Aayog) வெளியிட்​டுள்ள வறுமை அளவின் மதிப்​பீடு​களுடன் ஒத்துப்​போவ​தாகச் சில விமர்​சகர்கள் சுட்டிக்​காட்​டி​யுள்​ளனர். ஏன் தரவுகள் மீது மாறுபட்ட கருத்​துக்கள் எழுகின்றன? வருமான ஏற்றத்​தாழ்வு பற்றிய விவாதம் உண்மையான தரவுகளின் அடிப்​படையில் இருக்க வேண்டுமா அல்லது சித்தாந்த நிலைப்​பாட்டின் அடிப்​படையில் இருக்க வேண்டுமா?

உலக வங்கி என்ன சொல்கிறது? - உலக வங்கியின் ‘2025 வசந்தகால வறுமை - சமவாய்ப்பு சுருக்க அறிக்கை’ (Spring 2025 Poverty and Equity Brief), ஏற்றத்​தாழ்வுகளை அளவிடு​வதற்​காகப் பயன்படுத்​தப்​படும் கினி குறியீடு (Gini Index) அளவின்படி, இந்தியாவின் வருமான ஏற்றத்​தாழ்வு மிதமாக உள்ளது என்றும், சமீப ஆண்டு​களில் இவற்றில் எந்த அபாயகரமான அதிகரிப்பும் இல்லை என்றும் கூறியுள்ளது.

மேலும், தீவிர வறுமையால் (Extreme Poverty) பாதிக்​கப்​பட்​டுள்ள இந்திய மக்களின் எண்ணிக்கை 2022-23இல் 2.3%ஆகக் குறைந்துள்ளது என்றும், 2011 மற்றும் 2023க்கும் இடையில் 17.1 கோடி இந்தி​யர்கள் தீவிர வறுமையில் இருந்து மீண்டு வந்துள்ளனர் என்றும் இந்த அறிக்கை கூறுகிறது.

உலக வங்கியின் மதிப்​பீட்​டின்படி, இந்தியாவின் கினி குறியீடு 2011-12இல் 28.8இலிருந்து 2022-23இல் 25.5ஆகக் குறைந்துள்ளது மட்டுமல்​லாமல், ஸ்லோவாக் குடியரசு, ஸ்லோவேனியா, பெலாரஸ் நாடுகளுக்குப் பிறகு உலகின் நான்காவது சமவாய்ப்பு வாய்ந்த நாடாக உள்ளது எனவும் கூறியுள்ளது. மக்களின் எதிர்​பார்ப்​புக்கு மாறாக, இந்தியாவின் வருமான ஏற்றத்​தாழ்வு நிலைகள் பல பெரிய வளர்ந்த நாடுகளுடன் ஒப்பிடத்​தக்கவை அல்லது அதற்கும் குறைவாக இருப்​ப​தாகவும் இவ்வறிக்கை தெரிவிக்​கிறது.

உலக வங்கி கூறியுள்ள இந்தக் கண்டறிதல்கள் ஒருவகையில் நிதி ஆயோக்கின் (NITI Aayog) பலபரிமாண வறுமைக் குறியீடு (Multidimensional Poverty Index-MPI) மதிப்​பீடு​களுடன் ஒத்துப்​போகின்றன. அதாவது, 2015-16 மற்றும் 2019-21க்கும் இடையில் ஏறக்குறைய 13.5 கோடி இந்தி​யர்கள் வறுமையில் இருந்து மீட்கப்​பட்​டுள்ளதாக நிதி ஆயோக் மதிப்​பிட்​டு உள்ளது.

நிதி ஆயோக் கூறியுள்​ளது​போலவே, உலக வங்கியின் பகுப்​பாய்வும் கடந்த 10 ஆண்டு​களில் எடுக்​கப்பட்ட நலவாழ்வு நடவடிக்கைகள் (Welfare Measures), நிதி உள்ளடக்க நடவடிக்கைகள் (Financial Inclusion), நேரடிப் பணப் பரிமாற்​றங்​களின் கணிசமான விரிவாக்கம் போன்றவை இந்தியாவின் பொருளா​தாரம் வேகமாக வளர்ந்த நிலையில், ஏற்றத்​தாழ்வைச் சமன் செய்ய உதவியிருக்​கலாம் என்று தெரிவிக்​கிறது.

பல ஆண்டுகளாக இந்தியாவில் ஏற்றத்​தாழ்வு கட்டுக்​கடங்​காமல் அதிகரித்து​வரு​கிறது என்ற மேற்கத்​தியக் கல்வி - ஊடக வட்டாரங்கள் பேசிவரு​கின்றன. அதை ஒப்பிடும்​போது, உலக வங்கியின் கண்டு​பிடிப்புகள் மாறுபட்​டுள்ள​தால், இதைப் பற்றிய விவாதங்கள் தற்போது சூடுபிடித்​துள்ளன.

தாமஸ் பிக்கெட்டி புதிர்: உலக வங்கியின் கண்டறிதல்கள் இந்தியாவில் தற்போது கடுமையான கேள்விக்கு உள்ளாக்​கப்​படும் அதே வேளையில், புகழ்​பெற்ற பொருளாதார நிபுணர் தாமஸ் பிக்கெட்​டி​யும், அவரது சகாக்​களும் 2017இல் உருவாக்கிய வருமான ஏற்றத்​தாழ்வு மதிப்​பீடு​களி​லும், அவற்றை உருவாக்கப் பயன்படுத்​தப்பட்ட முறையியலில் நம்பகத்​தன்மை இல்லாமல் இருந்த​போ​திலும் அதைப் பற்றி யாரும் கேள்வி எழுப்​ப​வில்லை.

தாமஸ் பிக்கெட்​டியின் வருமான ஏற்றத்​தாழ்வு குறித்த மதிப்​பீ​டானது, பெரும்​பாலும் வருமான வரித் தரவுகளி​லிருந்து பெறப்​பட்டு, அதிக வருமானம் பெறும் மக்களின் தரவுகளை மட்டும் பயன்படுத்தி, இந்தியா வருமான ஏற்றத்​தாழ்வு கொண்ட நாடு என்று முத்திரை குத்தி​யுள்ளது.

ஒரு பெரிய முறைசாராத் துறை (Unorganised Sector) உள்ள ஒரு நாட்டில், வருமான வரிப் பதிவுகளை மட்டுமே நம்பி​யிருப்​பதால் உருவாகும் குறுகிய பார்வை, வருமான வளர்ச்சிப் போக்கு​களைத் திட்ட​மிடு​வதில் உள்ள அனுமானங்கள், குறைந்த - நடுத்தர வருமானப் பிரிவு மக்களின் யதார்த்​தங்​களைச் சிறப்​பாகப் பிரதிபலிக்கும் நுகர்​வுகள் பற்றிய வீட்டுக் கணக்கெடுப்பு ஆகிய தரவுகளைப் புறக்​கணித்து​விட்டு, வருமான ஏற்றத்​தாழ்வுகளை எப்படிக் கணக்கிட முடியும் என தாமஸ் பிக்கெட்டியை யாருமே கேட்க​வில்லை.

குடும்​பங்​களின் நுகர்வுச் செலவு உள்ளிட்ட பல காரணி​களைக் கொண்டு, உலக வங்கியால் விரிவான பகுப்​பாய்​வுகள் மூலம் செய்யப்​பட்​டுள்ள கண்டறிதல்களை விமர்​சிப்​பவர்கள், தாமஸ் பிக்கெட்​டியால் வெறும் 2.1% மக்களின் (2023-24 தரவுகளின்படி) வருமான வரித் தரவுகளைக் கொண்டு உருவாக்​கப்பட்ட கினி குறியீட்டை எப்படி ஏற்றுக்​கொண்​டார்கள் என்பது தெரிய​வில்லை.

இரட்டைத் தரநிலைகள்: பல நேரங்​களில் தரவுகளைப் புறந்​தள்​ளி​விட்டு, கல்விசார் குழுச் சிந்தனை, சித்தாந்த சார்புகள், புவிசார் அரசியல் கருத்​துக்​களின் அடிப்​படையில் ஏற்றத்​தாழ்வுகள் பற்றிய முடிவுகள் எடுக்​கப்​படு​கின்றன. இந்தியாவின் எதிர்​மறையான பிம்பத்தைச் சித்தரிக்கும் எந்தவொரு உலகளாவிய நிறுவனம் அல்லது அறிஞர் கூறும் தரவுகள், கண்டு​பிடிப்புகள் சிலருக்கு நம்பகமான ஆதாரமாகி​விடு​கின்றன.

இதே உலக வங்கி, வேலை இழப்பு, வறுமை அதிகரிப்பு அல்லது பொருளாதார மந்தநிலையை முன்னிலைப்​படுத்தும் ஓர் அறிக்கையை வெளியிட்​டால், அது அரசுக்கு ஓர் ‘எச்சரிக்கை மணி’ என விவாதங்கள் பெரியளவில் நடத்தப்​படு​கின்றன.

ஆனால், அதே நிறுவனம் இந்தியாவின் மிதமான ஏற்றத்​தாழ்வு அல்லது குறிப்​பிடத்தக்க வறுமைக் குறைப்​புக்கான ஆதாரங்களை முன்வைக்​கும் போது, திடீரென்று அது சந்தேகத்துக்கு உரியதாக ஆகிவிடு​கிறது அல்லது அரசாங்​கத்தின் நிலைப்பாட்டுக்கு ஆதரவாகச் செயல்​
படு​வ​தாகக் குற்றம்​சாட்​டப்​படு​கிறது.

அறிவுநேர்​மையற்றது: இத்தகைய போக்கு புதியதல்ல. ஆனால், இந்தியாவின் அதிக சார்புகள் கொண்ட அரசியல் சூழலின் (Hyper-polarised Political Climate காரணமாக இது தற்போது தீவிரமடைந்துள்ளது. உலக வங்கி, பன்னாட்டு நாணய நிதியம் (IMF) அல்லது இந்தியாவின் உள்நாட்டுப் புள்ளிவிவர முகமைகள் போன்ற நிறுவனங்கள் பெரும்​பாலும் போட்டி அரசியலின் புயலில் சிக்கிக்​கொள்​கின்றன. இது பொது விவாதத்​துக்கு மட்டுமல்ல, ஆராய்ச்சி, கொள்கை சார்ந்த விவாதத்தின் நம்பகத்​தன்​மைக்கும் மிகவும் ஆபத்தானது.

தரவுகளை அரசியல் வசதிக்காக மட்டும் பயன்படுத்​தாமல், அவற்றின் முறையியல் சார்ந்த அடிப்படை அம்சங்​களைக் கேள்விக்கு உள்படுத்த வேண்டும். ஒருபுறம் தமக்கு உள்ள நம்பிக்கைகளை உறுதிப்​படுத்தும் அறிக்கைகளை மட்டும் ஏற்றுக்​கொண்டு, மறுபுறம் அந்த நம்பிக்கைகளைக் கேள்விக்​குள்​ளாக்கும் அறிக்கைகளை நிராகரிப்பது அறிவுநேர்​மையற்றது; பொருளா​தாரக் கொள்கை குறித்த அர்த்​த​முள்ள உரையாடலைக் குறைம​திப்​புக்கு உள்படுத்து​கிறது.

இந்தியா போன்ற ஒரு பரந்த / பன்முகத்​தன்மை கொண்ட நாட்டில் வருமானப் பகிர்வின் சிக்கலான தன்மைகளை எந்த ஒரு தரவுத்​தொகுப்​பாலும் முழுமை​யாகப் படம்பிடிக்க முடியாது என்பதைப் புரிந்து​கொள்வது மிக முக்கியம்.

நமக்குப் பிடிக்காத கண்டறிதல்களை நிராகரிப்பது அல்லது முன்தீர்​மானிக்​கப்பட்ட கருத்​துக்​களுக்கு ஒத்துப்​போவதை ஏற்றுக்​கொள்​வதற்குப் பதிலாக, கொள்கை வகுப்​பாளர்​களும், விமர்​சகர்​களும் ஆதாரங்​களுடன் வெளிப்​படையான, விமர்​சனரீ​தியாக ஈடுபடும் கலாச்​சா​ரத்தை வளர்த்​துக்​கொள்ள வேண்டும்.

எப்போதும் பதற்றமான அரசியல் சூழல் உள்ள நம் நாட்டில், குறுகிய கால விவாதங்​களுக்குப் புள்ளி​விவரங்களை ஆயுதமாக்குவது கவர்ச்சிகர​மானதாக இருக்​கலாம். ஆனால், இந்தப் பழக்கம் பொது விவாதத்​துக்கும் கொள்கை உருவாக்​கத்​துக்கும் பெரிய தீங்கு விளைவிக்​கக்​கூடும்.

நேர்மையான மதிப்​பீட்டின் மூலம் மட்டுமே மேலோட்டமான விவாதங்​களுக்கு அப்பால் உயர்ந்து, ஏற்றத்​தாழ்வைச் சமாளிப்பது, வறுமையைக் குறைப்பது, அனைவரையும் உள்ளடக்கிய வளர்ச்சியை மேம்படுத்துவது போன்ற உண்மையான கொள்கைச் சவால்களை இந்தியா எதிர்​கொள்ள முடியும்.

- தொடர்புக்கு: narayana64@gmail.com