மரபணு திருத்தப்பட்ட நெல் இந்தியாவுக்குத் தேவையா?

புதிய வகை நெல் ரகங்கள் கண்டுபிடிப்பில் இந்தியா சாதனை படைத்துள்ளது. ஆமாம், இந்திய வேளாண் ஆராய்ச்சிக் கழகம் (ICAR) சமீபத்தில் ஏற்பாடு செய்த ஒரு நிகழ்ச்சியில், உலகின் முதல் மரபணு திருத்தப்பட்ட (Genome-edited) இரண்டு நெல் வகைகளை மத்திய வேளாண் அமைச்சர் வெளியிட்டதன் மூலம், இந்தியா விவசாயக் கண்டுபிடிப்புகளில் ஒரு புதிய அத்தியாயத்தைப் படைத்துள்ளது. வேளாண் அமைச்சகத்தின் 2024-25ஆம் ஆண்டுக்கான மதிப்பீட்டின்படி, முதன்முதலாக சீனாவின் நெல் உற்பத்தியை (14.7 கோடி டன்) விஞ்சி, இந்தியா 14.95 கோடி டன் உற்பத்தி செய்து, உலகின் மிகப்பெரிய நெல் உற்பத்தியாளராக உருவெடுத்துள்ளது.

இது கூடுதலாக ஒரு சாதனை! அதேவேளை​யில், இது தொடர்பான சில முக்கியக் கேள்வி​களும் எழுகின்றன. இந்தியா ஏற்கெனவே தேவைக்கு அதிகமாக நெல் பயிரிடும்​போது, மரபணு திருத்​தப்பட்ட நெல் தேவையா? புதிய நெல் ரகங்கள் பாதுகாப்​பானவையா? இந்தியாவின் மொத்த விவசா​யிகளின் எண்ணிக்கை​யில், 86%ஐக் கொண்டுள்ள குறு, சிறு விவசா​யிகளுக்கு இப்புதிய ரகங்கள் பயனளிக்​குமா?

ஏன் நெல்லைத் தேர்வுசெய்ய வேண்டும்? - நெல் தற்போது இந்தியாவில் சுமார் 4.7 கோடி ஹெக்டேர் பரப்பளவில் பயிரிடப்​படு​வதோடு மட்டுமல்​லாமல், பரப்பளவில் முதன்மைப் பயிராகவும் திகழ்​கிறது. அதேவேளை​யில், ஒரு கிலோ நெல் உற்பத்​திக்கு 3,000 - 5,000 லிட்டர் தண்ணீர் தேவைப்​படு​வ​தால், பல மாநிலங்​களில் அளவுக்கு அதிகமாக நிலத்தடி நீரை உறிஞ்​சுவதற்கு நெற்பயிர் காரணமாக உள்ளது.

தண்ணீரை அதிகம் வயலில் நிறுத்தி நெல் சாகுபடி செய்யப்​படு​வ​தால், அதிகளவில் மீத்தேன் வெளியேறு​வ​தாக​வும், இதனால் இந்தியாவின் மொத்த விவசாயப் பசுங்குடில் வாயு வெளியீடு அதிகரிப்​ப​தாகவும் கூறப்​படு​கிறது. ஆனால், புதிதாக அறிமுகப்​படுத்​தப்​பட்​டு உள்ள மரபணு திருத்​தப்பட்ட நெல் வகைகள், மூன்று முக்கிய நன்மைகளை வழங்கு​வ​தாகக் கூறப்​பட்​டுள்ளது. ஒன்று, சீக்கிரம் முதிர்ச்சி​யடைவ​தால், அறுவடைக் காலம் அதன் தாய் நெல் வகைகளைவிட 15-20 நாள்கள் குறைகிறது.

இரண்டு, அறுவடைக் காலம் குறைவ​தால், நீர்ப்​பாசனத்தில் இரண்டு முதல் மூன்று சுற்றுத் தண்ணீர் தேவையைக் குறைக்​கிறது. மூன்று, இவ்வகை நெல் ரகங்கள் விளைச்சலை 15-20% அதிகரிப்​ப​தோடு, வறட்சியைத் தாங்கும் தன்மை​யையும் கொண்டுள்ளன. நெல் சாகுபடிக்கான இடுபொருள்​களின் தேவை குறைந்து, விவசா​யிகளின் வருமானத்தை அதிகரிப்​ப​தோடு, நெகிழ்வான பயிர்ச் சுழற்சிகளை (flexible crop cycles) நடைமுறைப்​படுத்து​வதற்கு இப்புதிய நெல் ரகங்கள் உதவக்​கூடும். சில விவசாய அமைப்புகள், மரபணு திருத்​தப்பட்ட நெல் ரகங்கள் பற்றிய அச்சத்தை வெளிப்​படுத்​தி​யுள்ளன.

மரபணு திருத்தம், மரபணு மாற்றப்பட்ட பயிர்​களி​லிருந்து (Genetically Modified Crops) முற்றிலும் வேறுபட்டது என்பதைப் புரிந்து​கொள்ள வேண்டும். மரபணு திருத்தம் என்பது வேறு பயிர்​களின் வெளி மரபணுக்களை (foreign genes) அறிமுகப்​படுத்​தாமல், ஒரு தாவரத்தின் அதன் சொந்த டிஎன்​ஏ-இல் இலக்கு மாற்றங்​களைச் செய்து உருவாக்​கப்​படு​வ​தாகும். ஆனால், இதற்கு நேர்மாறாக, மரபணு மாற்றப்பட்ட பயிர்கள், பிற இனங்களி​ல் இருந்து (other species) மரபணுக்களை எடுத்துப் பயிர்​களில் செருகு​வ​தால், அவை சுற்றுச்​சூழல், சுகாதாரப் பிரச்சினைகளை ஏற்படுத்​தக்​கூடும்.

இந்த முக்கியமான வேறுபாட்டை அங்கீகரித்து, இந்தியா 2022ஆம் ஆண்டு வெளியிட்​டுள்ள ‘மரபணு திருத்​தப்பட்ட தாவரங்​களின் பாதுகாப்பு மதிப்​பீட்டுக்கான வழிகாட்டு​தல்கள்’ பற்றிய அறிக்கை, சில மரபணு திருத்​தப்பட்ட பயிர்களை, மரபணு மாற்றப்பட்ட பயிர்​களுக்கு உள்ள நீண்ட ஒழுங்குமுறை செயல்​முறையி​லிருந்து விலக்கு அளித்​துள்ளது. இது அமெரிக்கா, ஜப்பான், ஆஸ்திரேலியா போன்ற நாடுகளில் உள்ள உலகளாவிய ஒழுங்குமுறை விதிகளுடன் ஒத்துப்​போகிறது.

கடுமையான அறிவியல் நெறிமுறை​களின் கீழ் உருவாக்​கப்​படு​கின்ற, மரபணு திருத்​தப்பட்ட பயிர்கள் நச்சுத்​தன்மை வாய்ந்தவை என்பதற்கான எந்த உறுதியான ஆதாரமும் இல்லை. உண்மை​யில், மரபணு திருத்​தப்பட்ட முறையில், வழக்க​மாகச் செய்யப்​படும் பயிர் இனப்பெருக்​கத்தைவிட (crop breeding) வேகமாக​வும், துல்லிய​மாகவும் புதிய பயிர்களை உருவாக்கி, பயிர்​களின் மீள்தன்மையை (crop resilience) உயர்த்தி, உணவு உற்பத்தியை அதிகரிக்க முடியும் எனக் கூறப்​படு​கிறது.

விவசா​யிகளின் வருமானத்தை அதிகரிக்​குமா? - இந்தியாவில் 86%க்கும் மேற்பட்ட விவசா​யிகள் 2 ஹெக்டேருக்கும் குறைவாக நிலம் வைத்திருக்கும் குறு, சிறு விவசா​யிகள். அவர்களுக்கு அறிவியல் புதுமை​யைவிட மலிவு விலை விதைகள், காலநிலை மாற்றத்தைச் சமாளித்தல், நிலையான வருமானம் ஆகியவை மிக முக்கியம். மரபணு திருத்​தப்பட்ட நெல் விதைகளும், கலப்பின விதைகள் (Hybrid seeds) அல்லது மரபணு மாற்றப்பட்ட விதைகள் (GM seeds) போல அதிக விலை நிர்ணயம் செய்யப்​பட்​டால், விவசா​யிகள் பாதிக்​கப்​படு​வார்கள். இருப்​பினும், தற்போது வெளியிடப்​பட்​டுள்ள இரண்டு புதிய நெல் வகைகளும், இந்திய வேளாண் ஆராய்ச்சிக் கழகத்தின் கீழ்வரும் பொதுத் துறை நிறுவனங்​களால் உருவாக்​கப்​பட்​டுள்ள​தால், இவற்றின் விலை அதிகமாக இருக்காது என நம்பலாம்.

இருந்த​போ​தி​லும், தேசிய உணவுப் பாதுகாப்புத் திட்டம், பிஎம் கிஸான் விதை, மினி-கிட்கள் போன்ற அரசுத் திட்டங்கள் மூலமாக​வும், வேளாண் கூட்டுறவுச் சங்கங்கள் மூலமாகவும் இவ்விதைகளைக் குறைவான விலையில் விநியோகித்தால் சிறு, குறு விவசா​யிகளும் பயன்படுத்த முடியும்.
2024–25இல் ஒரு குவிண்டால் நெல்லுக்குக் குறைந்தபட்ச ஆதார விலையாக ரூ.2,320 கொடுக்​கப்​பட்டு, கொள்முதல் செய்யப்​பட்​டாலும் உரம், டீசல், கூலிச் செலவுகள் வேகமாக அதிகரித்து​வரு​வ​தால், பயிர்ச் செலவை மீட்ப​தற்கு விவசா​யிகள் பெரிதும் போராடு​கிறார்கள்.

மேலும், சமீப காலமாக ஏற்பட்​டுள்ள ஒழுங்கற்ற வானிலை, பயிர் சாகுபடியில் நஷ்டங்களை அதிகரித்​துள்ளது. குறுகிய அறுவடைக்​காலம், வறட்சியைத் தாங்கும் தன்மை கொண்ட மரபணு திருத்​தப்பட்ட நெல் வகைகள், இடுபொருள்​களின் பயன்பாட்​டையும் நீர்ப்​பாசனத் தேவைகளையும் குறைத்து அதிக மகசூல் கொடுப்​பதால் விவசா​யிகளின் வருமானத்தை அதிகரிக்க உதவக்​கூடும்.

எதிர்​காலம் நோக்கி: இந்தியாவில் நெல் உற்பத்​தியில் ஏற்பட்​டு உள்ள அதீத வளர்ச்சி, பிற அத்தி​யா​வசியப் பயிர்​களில் உள்ள பெரும் பற்றாக்​குறையை மறைக்​கிறது. உள்நாட்டு உற்பத்தி போதாத காரணத்​தால், 2023–24இல் மட்டும் நமது நாடு 1.59 கோடி டன்களுக்கு மேல் சமையல் எண்ணெயை​யும், ஏறத்தாழ 47.4 லட்சம் டன் பருப்பு வகைகளையும் இறக்குமதி செய்த காரணத்​தால், ரூ.1.4 லட்சம் கோடிக்கும் அதிகமான இறக்குமதிச் செலவு ஏற்பட்​டு உள்ளது.

நெல் பயிர்​களுக்குக் கொடுக்​கப்​படு​கின்ற பயிர் இனப்பெருக்க ஆராய்ச்சி முன்னுரிமை, அதனுடன் தொடர்​புடைய முதலீடுகள், பருப்பு, எண்ணெய்​வித்துப் பயிர்​களுக்குக் கொடுக்காத காரணத்​தால், இப்பயிர்​களின் உள்நாட்டு மகசூல் உலகளவில் ஒப்பிடும்போது மிகக் குறைவாக உள்ளது.

இந்த ஏற்றத்​தாழ்வை மரபணு திருத்தம் செய்யப்பட்ட விதைகளை உருவாக்குவதன் மூலம் சரிசெய்ய முடியும். ஊட்டச்​சத்து, விவசா​யிகளின் உயர் வருமானத்​துக்கு முக்கியமான கொண்டைக் கடலை, துவரம் பருப்பு, நிலக்​கடலை, கடுகு போன்ற பயிர்​களில், வறட்சியைத் தாங்கி, பூச்சி எதிர்ப்புத்​தன்மையை அதிகரித்து, மகசூலை உயர்த்த இப்புதிய தொழில்​நுட்பம் உதவக்​கூடும். மரபணு திருத்​தப்பட்ட நெல் ரகங்கள் மூலமாக, நெல் சாகுபடிப் பரப்பளவை விரிவுபடுத்து​வதற்கோ அல்லது ஒற்றைப் பயிர் (mono-crop) சாகுபடியை மேலும் தீவிரப்​படுத்து​வதற்கோ முயற்சி எடுக்​கப்​பட்​டால், அது வேளாண் வளர்ச்சியில் பல பிரச்சினைகளை ஏற்படுத்​தக்​கூடும்.

மாறாக நீர்ப் பற்றாக்​குறை, காலநிலை பாதிப்​புக்கு உள்ளான பகுதி​களில், தற்போதுள்ள நெல் சாகுபடிக்குப் பதிலாக நிலையான முறையில் பயிர் செய்வதற்கு ஒரு கருவியாக இந்தப் புதிய நெல் ரகங்களைப் பயன்படுத்த வேண்டும். இதன் நன்மை விவசா​யிகளுக்குக் கிடைக்க, பொது விதை அமைப்புகள் எந்தவித நெருக்​கடிக்கும் ஆளாகாமல் மலிவு விலையில் விதைகள் கிடைப்பதை உறுதிப்​படுத்த வேண்டும்.

அதேநேரத்​தில், நெல்லைவிட அதிகப் பரப்பளவில் பயிரிடப்​படும் பருப்பு, எண்ணெய்​வித்துப் பயிர்​களில், உற்பத்​தித்​திறன் மிகவும் குறைவாக உள்ள காரணத்​தால், இப்பயிர்​களில் மரபணு திருத்​தப்பட்ட விதைகளை உருவாக்க ஆராய்ச்சிகளை முடுக்​கிவிட வேண்டும்.

மரபணுத் திருத்தம் மாற்றத்​துக்கான ஒரு சக்தி​வாய்ந்த நெம்பு​கோலாக இருக்க வேண்டு​மென்​றால், அது இடுபொருள்​களின் சார்புநிலையைக் குறைத்து, மீள்தன்மையை மேம்படுத்தி, நாட்டில் அதிகமாக உள்ள குறு, சிறு விவசா​யிகளுக்கு உதவக்​கூடிய பரந்த இலக்கு​களுடன் இருக்க வேண்டும். அறிவியல் முன்னேற்றம் சமூகத்​துக்குப் பெருமளவில் பயனளித்தால் மட்டுமே, அதற்கு உண்மையான மதிப்பு இருக்கும் என்பதைக் கொள்கை வகுப்​பாளர்கள் நினைவில் கொள்ள வேண்டும்​.

- தொடர்புக்கு: narayana64@gmail.com