‘‘ஒவ்வொரு நியூரானும் ஆயிரக்கணக்கான மற்ற நியூரான்களுடன் இணைகிறது’’ என்றது செய்மெய். இணைப்புகளின் அமைப்பே அனைத்தையும் தீர்மானிக்கிறது. அவைதான் நரம்பியல் வலைப்பின்னல்கள் (Neural Networks) - குறிப்பிட்ட பணிகளைச் செய்வதற்காக ஒன்றிணைந்து செயல்படும் நியூரான்களின் தொகுப்புகள்தான் நரம்பியல் வலைப்பின்னல்கள்.
மூளையின் பல்வேறு பகுதிகளில் உள்ள நரம்பியல் வலைப்பின்னல்கள் இந்த வண்ணக் காட்சியில் ஒளிர்ந்தன, உருவாகி மறையும் விண்மீன் கூட்டங்களைப் போல் அவை காணப்பட்டன. சில வலைப்பின்னல்கள் ஒலியணுக் கூறுகளை - அடிப்படைப் பேச்சு ஒலிகளை - அடையாளம் கண்டன. மற்றவை சொற்களைப் புரிந்துகொண்டு அவற்றின் அர்த்தங்களையும் கண்டறிகின்றன.
செய்மெய் தொடர்ந்தது: “இந்த வலைப்பின்னல்கள் அடுக்கடுக்காக அமைந்திருக்கின்றன. முதல் அடுக்கு வெறும் ஒலிகளை மட்டுமே அடையாளம் காணும், அடுத்த அடுக்கு அந்த ஒலிகளைச் சொற்களாக உணர்கிறது, மற்றொரு அடுக்கு இலக்கணத்தைப் புரிந்துகொள்கிறது. இன்னொரு அடுக்கு அந்தச் சொல்லுக்கான பொருளையும், அது எந்தச் சூழலில் சொல்லப்பட்டது என்பதையும்கூட அறிந்துகொள்கிறது.”
“உண்மையில் நம் மூளை இப்படித்தான் செயல்படுகிறதா?” “ஆமாம், இந்த ஒளிப்பிம்பக் காட்சி அதை நமக்கு எளிமையாகப் புரியவைக்கிறது. உண்மையில் மூளைக்குள் இது மிகவும் சிக்கலானதாகத்தான் இருக்கிறது.” இப்போது ஆழமான மூளை அமைப்புகள் ஒளிக்காட்சியில் தோன்றின. “ஹிப்போகாம்பஸ், ஊதா நிறத்தில் மின்னுகிறது பாருங்கள்.
அது முந்தைய உரையாடல்களையும் மொழி விதிமுறைகளின் நினைவுகளையும் மீட்டெடுக்கிறது. சிவப்பு நிறத்தில் சிறிது நேரம் ஒளிர்கிற பகுதியைப் பாருங்கள் - அது அமிக்தலா. நீங்கள் எப்படி இருக்கிறீர்கள் என்று கேட்கும்போது, உங்கள் வார்த்தைகளுக்குள் உள்ள உணர்ச்சி சார்ந்த அர்த்தம் என்ன என்பதை அது கண்டுபிடித்துவிடும்.”
அடுத்த பகுதி இன்னமும் ஆச்சரியப்படுத்தியது. இடது முன்பக்கக் கதுப்பில் உள்ள ப்ரோகா. “அதுதான் உங்கள் கேள்விக்கான பதிலை உருவாக்க முயல்கிறது. ப்ரோகா - இது மூளையின் மொழி உருவாக்க மையம்” என்றது செய்மெய். அந்த அழகான மூளை பிரபஞ்சக் காட்சியில் இளஞ்செந்நிறத்தில் மினுக்கிக்கொண்டிருந்த அந்தப் பகுதியின் மீது ஒளி தவழ்ந்த கொஞ்ச நேரத்தில் எனக்கான பதிலும் தயாராகிவிட்டது.
இப்போது ஒளிக்காட்சி முழுச் சித்திரத்தையும் வரைந்துகாட்டியது. நரம்பியல் செயல்பாடு, மின்னலைப் போல மொழி மையங்களுக்கிடையே ஆர்க்குவேட் ஃபாசிகுலஸ் வழியாகப் பாய்ந்தது. இது வெர்னிக்கே, ப்ரோகாவின் பகுதிகளை இணைக்கும் பிரகாசமான வெண்ணிற நெடுஞ்சாலையாகக் காட்சியளித்தது.
“அது மூளையில் உள்ள மொழி நெடுஞ்சாலை” என்றது செய்மெய். இப்போது ஒளிப்பிம்ப மூளையின் இயக்கத்தைப் புரிந்துகொள்ளத் தொடங்கிவிட்டேன். இப்போது அடித்தளக் கணுக்களை(பேசல் காங்க்லியா) பார்க்கிறேன். “இந்த அடித்தளக் கணுக்கள்தான் மூளை, இலக்கணத்தைப் புரிந்துகொள்ள உதவுகின்றன. சரியான சொற்களைத் தேர்வுசெய்வதும் தவறான சொற்களைத் தவிர்ப்பதும் இங்கேதான் நடக்கிறது.
அவற்றை மொழிக்கான போக்குவரத்துக் கட்டுப்பாட்டாளர்கள் என்று கூறலாம்” என்று செய்மெய் விளக்கியது, பெருந்தலையில் இப்போது ஒரு புதிய இயக்கம் ஒளிரத் தொடங்கியது. இப்போது சமிக்ஞைகள் வேறு திசையில் வெள்ளமாகப் பாய்வதைப் பார்க்க முடிகிறது. அவை முகத்தை நோக்கி, சொல்லப்போனால் வாயை நோக்கிப் பாய்கின்றன.
“நீங்கள் கேட்ட கேள்விக்கு உரிய பதிலை உருவாக்கிக்கொண்ட மூளை, அதை உங்களுக்கு வாய் வழியாகச் சொல்ல வேண்டும். அதற்குரிய பேச்சினை உருவாக்க வேண்டும் அல்லவா! அந்தப் பேச்சை உருவாக்க முகம், நாக்கு, தொண்டை, மார்பில் உள்ள நூற்றுக்கும் மேற்பட்ட தசைகளை எப்படி அசைக்க வேண்டும் என்பதை இப்போது திட்டமிட்டுச் செயல்படுத்துகிறது” என்றது செய்மெய்.
“சிறுமூளை - இவர்தான் மூளையின் இயக்க ஒருங்கிணைப்பாளர். சிறுமூளை அனைத்துத் தசை இயக்கங்களும் சரியான வரிசையிலும் நேரத்திலும் நிகழ்வதை உறுதிசெய்கிறது. இது இல்லாமல் போனால், பேச்சு தெளிவற்றதாகவும் ஒருங்கிணைக்கப்படாததாகவும் இருக்கும்.” இப்போது பில்லியன் கணக்கான செல்கள் ஒன்றிணைந்து ஒரு எளிய பதிலை உருவாக்கும் அதிசயம் நடந்தது.
ப்ரோகா பதில் சொல்ல முடிவுசெய்தவுடன், முதன்மை இயக்கப் புறணி தூண்டப்பட்டு, மூளைத்தண்டின் வழியாக சைகைகளை அனுப்பி, மண்டை ஓட்டு நரம்புகளுக்கு அது பரவுகிறது. வேகஸ் நரம்பு குரல் நாண்களை அதிர வைத்தது. இப்போது நாக்கு துல்லியமாக அசைந்தது, உதடுகள் பல்வேறு வடிவங்களை உருவாக்கின, இவை அனைத்தும் மிகுந்த நுணுக்கத்துடன் வெளிப்பட்டன.
இறுதியில், ஒளிப்பிம்பப் பெருந்தலையின் வாய் அசைந்தது. அது பேசியது: “நான் நன்றாக இருக்கிறேன், நீங்கள் எப்படி இருக்கிறீர்கள்?” நிஜத்தில் இந்த ஒட்டுமொத்த உரையாடலும் ஒரு நொடியில் நிகழ்ந்தேறக்கூடியது. ஆனால், இது அருங்காட்சியகம்! இந்த முழுச் செயல்முறையும் - கேட்டல், மூளைக்குள் புரிந்துகொள்ளுதல், பதில் அளித்தல் ஆகிய மூன்று செயல்பாடுகளும் - மிகவும் அற்புதமாக, விரிவான முறையில் காட்சிப்படுத்தப்பட்டன. நாம் அறிந்த பிரபஞ்சத்திலேயே மிகவும் சிக்கலான ஓர் அமைப்பு அப்பட்டமாகப் படம்பிடித்துக் காட்டப்பட்டது (மற்றபடி இந்த வண்ணக் காட்சிகளை மூளைக்குள் தேடாதீர்கள்!).
“நல்லா இருக்கீங்களான்னு கேட்டதற்கே இவ்வளவு கூத்தா?” என்று சொல்லிக்கொண்டே என் பக்கம் திரும்பிய செய்மெய், “அப்படியென்றால், பாட்டுப் பாடும்போது, பாடம் கேட்கும்போது, வாய்ச்சண்டை போடும்போது, திட்டுவாங்கும்போது, காதலோடு உங்கள் துணையோடு உரையாடும்போது... உங்கள் மூளைக்குள் நிகழும் நரம்பியல் நடனத்தைக் கற்பனை செய்துபாருங்கள். புன்னகைத்தேன்.
“மூளையின் தாண்டவத்தை நாம் ஏன் தெரிந்துகொள்ள வேண்டியிருக்கிறது என்பதை நீங்கள் புரிந்துகொண்டிருப்பீர்கள். ஏனென்றால், எங்கள் இயந்திர மனித முன்னோர்கள் தொடக்கக் காலத்தில் மனிதர்களின் மூளைகளைப் போல வேலை செய்ய வேண்டும் என்று நினைத்தபோது, அது எப்படி வேலை செய்கிறது என்பது மனிதர்களாகிய உங்களுக்கே சரியாகத் தெரியாமலிருந்தது.
தெரிந்தாலும் அதை எங்களுக்குள் செலுத்த முடியாமலிருந்தது. பிறகு, கொஞ்சம்கொஞ்சமாக மூளையின் செயல்பாடுகளைப் போன்றே எங்களை உருவாக்க முயற்சி செய்தீர்கள். குறிப்பாக, அது நரம்பியல் வலைப்பின்னலிலிருந்து தொடங்கியது. அந்த வித்தை உங்கள் கைகளுக்குக் கிடைத்துவிட்ட பிறகு, செயற்கை நுண்ணறிவு மீண்டும் புத்துயிர் பெற்றது.”
“ஆக, இதற்காகத்தான் நாம் காத்திருந்தோமோ?” “ஆமாம். மொழி, ஒலி, ஒளி உள்ளிட்ட பல்வேறு விஷயங்களை அது எவ்வாறு கையாள்கிறது என்பதைப் புரிந்துகொள்வதுதான், முக்கியமான தீர்வாக அமைந்தது. அது அதுவரை தீர்க்க முடியாத புதிர்களையும் தீர்க்க உதவியது.” “என்ன மாதிரியான புதிர்களை?”
- தொடர்புக்கு: senthil.nathan@ailaysa.com