2025 மார்ச் மாதம் 28ஆம் தேதி, தென்கிழக்கு ஆசியாவிலேயே நிலநடுக்கச் செயல்பாடுகள் அதிகம் உள்ள பகுதியான சகைங் பிளவு (Sagaing Fault) அருகே 7.7 ரிக்டர் அளவு நிலநடுக்கம் ஏற்பட்டது. இது மயன்மாரில் பேரழிவுச் சேதத்தை ஏற்படுத்தியது. மோசமான கட்டமைப்பு / வடிவமைப்புகளால் பல கட்டிடங்கள் இடிந்து விழுந்தன.
குறிப்பாக, வலுவூட்டப்படாத செங்கல் அல்லது தரம் குறைந்த பொருள்களால் ஆன கட்டிடங்கள் இடிந்து தரைமட்டமாகின. பொருளாதாரக் கட்டுப்பாடுகள், பழமையான கட்டிட விதிமுறைகள் போன்ற காரணிகள் சேதத்தை மேலும் அதிகரித்து, கணிசமான உயிரிழப்புகளை ஏற்படுத்தின.
அண்டை நாடான தாய்லாந்திலும் நிலநடுக்கம் ஏற்பட்டது. தலைநகர் பாங்காக், நிலநடுக்க மையத்திலிருந்து தொலைவில் இருந்ததால், தாக்கம் குறைவாகவே இருந்தது. 33 மாடிக் கட்டிடம் ஒன்று வடிவமைப்பு குறைபாடு காரணமாக இடிந்து விழுந்தது. பாங்காக்கின் சில பழைய கட்டமைப்புகளில் உள்ள பலவீனங்கள் வெளிப்பட்டன.
இருப்பினும், மயன்மாருடன் ஒப்பிடுகையில் பாங்காக்கில் உயிரிழப்புகள் குறைவு. நவீன நிலநடுக்க விதிமுறைகள், தீவிரமான நடைமுறைப்படுத்துதல், சிறந்த கட்டுமானப் பொருள்கள் ஆகியவை பாங்காக்கைப் பாதுகாத்தன. இந்தச் சூழலில், நிலநடுக்கப் பாதிப்புகளை எதிர்கொள்வதில் இந்தியாவின் நிலவரம் குறித்தும் பார்க்க வேண்டும்.
கட்டமைப்பு வடிவமைப்பு வேறுபாடுகள்: நிலநடுக்கத்தின்போது ஏற்படும் சேதங்கள் கட்டமைப்பு வடிவமைப்பின் பங்கை அடிக்கோடிட்டுக் காட்டுகின்றன. புதுப்பிக்கப்பட்ட நிலநடுக்க விதிமுறைகளின் காரணமாக 2007, 2021 ஆண்டுகளில் கடுமையான சேதங்களிலிருந்து பாங்காக் தப்பியது. சர்வதேசக் கட்டிட விதிமுறை (IBC), கட்டிடங்கள் - பிற கட்டமைப்புகள் தொடர்பான அளவுகோல்கள் (ASCE 7) ஆகியவற்றின் அடிப்படையில் இந்த விதிமுறைகள் உருவாக்கப்பட்டன.
சகைங் பிளவுக் கோடு மயன்மாரை ஊடறுத்துச் செல்வதால், அந்நாடு அதிக நிலநடுக்க ஆபத்தை எதிர்கொள்கிறது. ஆனால், அதைச் சமாளிக்க உள்கட்டமைப்பு வசதி இல்லை. கட்டிட விதிமுறைகள் பழமையானவை மட்டுமல்ல, அவற்றைக்கூட மயன்மார் மக்கள் முறையாகக் கடைப்பிடிப்பதில்லை. விதிமுறைகளைப் பின்பற்றுவது செலவு பிடிக்கும் விஷயம் எனக் கருதிப் பலரும் அவற்றைத் தவிர்க்கின்றனர். பல கட்டமைப்புகளுக்கு வலுவூட்டப்படாத செங்கற்களைப் பயன்படுத்துகின்றனர்.
இந்தியாவைப் பொறுத்தவரை, நிலநடுக்கப் பாதிப்பானது இந்தியத் தட்டு - யுரேசியத் தட்டு மோதலால் ஏற்படுகிறது. இது ஆண்டுக்கு 47 மி.மீ. வேகத்தில் நகர்கிறது. இந்தியத் தரநிலைகள் பணியகம், இந்தியாவை நான்கு நிலநடுக்க மண்டலங்களாக (2,3,4,5) வகைப்படுத்துகிறது: மண்டலம் - ஐந்து மிக அதிகமான ஆபத்தை எதிர்கொள்கிறது; இது வட கிழக்கு இந்தியா, இமயமலைப் பகுதிகள், குஜராத்தின் ரான் ஆஃப் கட்ச், அந்தமான் - நிகோபார் தீவுகளை உள்ளடக்கியது. டெல்லி, சிக்கிமை உள்ளடக்கிய மண்டலம் - நான்கு அதிக ஆபத்தை எதிர்கொள்கிறது. மிதமான ஆபத்தை எதிர்கொள்ளும் மண்டலம் - மூன்றில் சென்னை, மும்பை, கொல்கத்தா உள்ளிட்ட முக்கிய நகரங்கள் உள்ளன. கேரள மாநிலம் முழுவதும் இந்த மண்டலத்துக்குள்தான் இருக்கிறது.
அதிக ஆபத்து கொண்ட நகரங்கள்: மண்டலம் - ஐந்தில் உள்ள நகரமான குவஹாத்தி, இந்தியாவில் நிலநடுக்கத்தால் மிகவும் பாதிக்கப்படக்கூடிய நகரமாக உள்ளது. இது இந்தோ-மயன்மார் வளைவுக்கு அருகில் பிரம்மபுத்திராவின் வெள்ளப்பெருக்குப் பகுதியில் அமைந்திருக்கிறது. இந்நகரத்தில் 10% கட்டிடங்கள் மட்டுமே நிலநடுக்கத்தைத் தாங்கும் திறன் கொண்டவை. பலவற்றில் வலுவூட்டப்படாத செங்கல் அல்லது சரியான அடித்தள வடிவமைப்பு இல்லை. மண்டலம் - நான்கு, டெல்லி - இமயமலை நிலநடுக்கப் பகுதிக்கு அருகில் இருப்பதால் கணிசமான ஆபத்தை எதிர்கொள்கிறது. சுமார் 80% கட்டிடங்கள் நிலநடுக்கத்தால் பாதிக்கப்படும் அபாயத்தில் உள்ளன.
மண்டலம் - ஐந்தில் உள்ள குஜராத்தின் புஜ் நகரம் நிலநடுக்கப் பாதிப்பை அதிகம் எதிர்கொள்ளும் நகரமாக உள்ளது. 2001இல் புஜ் நகரில் ஏற்பட்ட நிலநடுக்கத்தில் 20,000க்கும் மேற்பட்டோர் உயிரிழந்தனர். அகமதாபாத் நகரிலும் கடும் உயிர்ச் சேதம் ஏற்பட்டது.
கட்டமைப்பு வடிவமைப்பு ஒப்பீடுகள்: இந்தச் சூழலில், நிலநடுக்கத்தை எதிர்கொள்ளும் விஷயத்தில் இந்திய நகரங்கள் எந்த அளவுக்குத் தயாராக உள்ளன? இந்தியாவின் ஐ.எஸ். 1893:2016 விதிமுறை, மண்டலம் - ஐந்தில் நிலநடுக்கத்தைத் தாங்கும் வடிவமைப்பைக் கட்டாயமாக்குகிறது. ஆனால், இந்த விதிமுறை முறையாகப் பின்பற்றப்படுவதில்லை. பல கட்டிடங்களில் வலுவூட்டப்படாத செங்கற்கள் பயன்படுத்தப்படுகின்றன; மென்மையான மண்ணுக்கு ஏற்ப உயரமான கட்டிடங்களில் சரியான அடித்தள வடிவமைப்பு இல்லை.
டெல்லி ஐ.எஸ். 1893:2016ஐப் பின்பற்றுகிறது. நவீன, உயரமான கட்டிடங்களில் வலுவூட்டப்பட்ட கான்கிரீட் பிரேம்களைப் பயன்படுத்துகின்றனர். ஆனால், நடைமுறைப்படுத்துதல் ஒரே மாதிரியாக இல்லை. 2000ஆம் ஆண்டுக்கு முன் உள்ள பல உயரமான கட்டிடங்கள் ஃபிளாட்-ஸ்லாப் (flat slab) அமைப்புகள் அல்லது வலுவூட்டப்படாத செங்கற்களைப் பயன்படுத்தி உருவாக்கப்பட்டிருக்கின்றன.
2001க்குப் பிறகு, குஜராத் கடுமையான நிலநடுக்கங்களை எதிர்கொள்வதற்கான தரக் கட்டுப்பாட்டு விதிமுறைகளை நடைமுறைப்படுத்தியது. மறுகட்டமைக்கப்பட்ட பல கட்டிடங்கள் சிறப்பாக வடிவமைக்கப்பட்டுள்ளன. ஆனால், பழைய கட்டமைப்புகள், கிராமப்புறக் கட்டுமானங்கள் வலுவூட்டப்
படாத செங்கற்களைப் பயன்படுத்தி உருவாக்கப்பட்டவை. புஜ் நகரின் மண் வெப்பத்தால் திரவமாதலுக்கு (Liquefaction) ஆளாகிறது (திரவமாக்கல் என்பது மண் போன்ற ஒரு திடப்பொருளைத் திரவப் பொருளாக மாற்றும் ஒரு செயல்முறை. இது இயற்கையாக நிகழ்வதுதான் என்றாலும், மனிதர்களின் செயல்பாடுகளும் இதற்கு வழிவகுக்கின்றன). இங்கு தேவைப்படும் ஆழமான குவியல் அடித்தளங்கள் (Pile foundations) பரவலாகப் பயன்படுத்தப்படவில்லை.
பாங்காக்கின் குறைந்த நிலநடுக்க ஆபத்து (0.1g முதல் 0.2g) சிறந்த வடிவமைப்பு நடைமுறைகளால் ஈடுசெய்யப்படுகிறது. நவீன, உயரமான கட்டிடங்களில் வலுவூட்டப்பட்ட கான்கிரீட் பிரேம்கள், வெட்டுச் சுவர்கள் (shear walls), ஆழமான குவியல் அடித்தளங்கள் ஆகியவற்றைப் பயன்படுத்துகின்றனர். இருப்பினும், சமீபத்திய நிலநடுக்கத்தின்போது, பழைய கட்டிடங்கள் சேதமடைந்தது பிளாட்-ஸ்லாப் அமைப்புகளின் பலவீனத்தைக் காட்டியது.
இந்தியா செய்ய வேண்டியவை: பாங்காக்கின் நவீன நிலநடுக்க விதிமுறைகள் இந்தியாவுக்கு ஒரு நல்ல முன்மாதிரியை வழங்குகின்றன. விதிமுறைகளை வலுப்படுத்துவது, மறுசீரமைப்பைத் துரிதப்படுத்துவது, மேம்பட்ட கட்டமைப்பு அமைப்புகளை ஏற்றுக்கொள்வது ஆகியவற்றின் மூலம், இந்தியா மீள்திறனை மேம்படுத்திக் கொள்ள முடியும், எதிர்கால நிலநடுக்கச் சவால்களுக்கு இந்தியாவின் நகர்ப்புறங்கள் சிறப்பாக, தயாராக இருப்பதை இதன் மூலம் உறுதிசெய்ய முடியும். மீள்திறன் சார்ந்த வடிவமைப்பு என்பது ஒரு தொழில்நுட்ப அவசியம் மட்டுமல்ல - இது உயிர்களைக் காப்பாற்றுவதற்கான கட்டாய தார்மிகத் தேவையும்கூட!
- தொடர்புக்கு: balathebest@gmail.com