இன்று உலக அளவில் கொண்டாடப்படும் உலக நலவாழ்வு நாளை ஒட்டி (World Health Day), உலகச் சுகாதார நிறுவனம் (WHO) இந்த ஆண்டு முழுவதும் கர்ப்பிணிகளின் நலத்தையும், பிறக்கும் குழந்தைகளின் நலத்தையும் மேம்படுத்தும் விதமாக, ‘ஆரோக்கியமான தொடக்கம், நம்பிக்கையான எதிர்காலம்’ (Healthy beginnings, hopeful futures) என்னும் கருப்பொருளை முன்னிறுத்திச் செயல்பட உள்ளது.
தற்போது உள்ள தரவுகளின் அடிப்படையில், உலகில் ஒவ்வோர் ஆண்டும் ஏறத்தாழ 3 லட்சம் பெண்கள் கர்ப்பத்தினாலோ, பிரசவம் காரணமாகவோ தங்கள் உயிரை இழக்கின்றனர்; 20 லட்சத்துக்கும் அதிகமான குழந்தைகள் பிறந்து முதல் மாதம் முடிவதற்குள் இறந்துவிடுகின்றன. மேலும், 20 லட்சம் குழந்தைகள் இறந்தே பிறக்கின்றன. இந்த இறப்புகள் எல்லாமே ‘தடுக்கக்கூடிய இறப்புகள்’ (Preventable deaths) என்னும் வகைமையில் வருவதால், இவற்றுக்கான காரணிகளைக் கட்டுப்படுத்துவதில் அதிகக் கவனம் செலுத்த வேண்டும் என்று உலக நாடுகளிடம் உலகச் சுகாதார நிறுவனம் வலியுறுத்துகிறது.
அடுத்து, 2030க்குள் ‘ஒரு லட்சம் பிரசவங்களில் 70க்கும் குறைவாகவே தாய் இறப்புகள் (Maternal deaths) இருக்க வேண்டும்’ என்பது ஐ.நா. கொடுத்திருக்கும் இலக்கு. இப்போது உள்ள பிறப்பு – இறப்பு விகிதங்களைப் பார்த்தோமானால், உலகளவில் ஐந்தில் நான்கு நாடுகள் 2030க்குள் கர்ப்பிணிகளின் உயிர்வாழ்வை மேம்படுத்துவதற்கான இலக்குகளை அடையத் தவறிவிட்டன.
இனியும் இந்தப் போக்கு நீடிக்குமானால், மூன்றில் ஒரு நாடு புதிதாகப் பிறக்கும் குழந்தைகளின் இறப்புகளைக் குறைப்பதற்கான இலக்குகளை அடையத் தவறிவிடும். எனவே, உலகச் சுகாதார நிறுவனம் எடுத்திருக்கும் இந்த முன்னெடுப்பு காலத்துக்கும் தேவையானது என்று வரவேற்கப்படுகிறது.
என்னென்ன காரணங்கள்? - வறுமை, கல்வியறிவு இல்லாதது, குழந்தைத் திருமணம், மருத்துவச் சேவைகளின் பற்றாக்குறை, தொலைதூரங்களில் உள்ள பல்நோக்கு மருத்துவமனைகளை அணுகுவதில் சிரமம், ‘வீட்டில் சுகப்பிரசவம் - தனிமனித உரிமை’ என்பது போன்ற போலி அறிவியல் நடைமுறைகள், மூடநம்பிக்கைகள் ஆகியவை தாயின் இறப்புக்கு வழிவகுக்கின்றன.
உலகளவில் 2017இல் 2.95 லட்சம் பிரசவ இறப்புகள் நிகழ்ந்துள்ளன. அதில், இந்தியாவில் மட்டும் 44 ஆயிரம் பெண்கள் கர்ப்பத்தின்போதும், பிரசவத்தின்போதும் இறந்ததாகக் கணக்கிடப்பட்டுள்ளது. இவற்றில், 94% பிரசவ இறப்புகள் ஏழைச் சமூகங்களில்தான் நிகழ்ந்துள்ளன. வறுமையும், அதனால் கிடைக்காமல் போன கல்வி அறிவும்தான் இதுபோன்ற இறப்புகளுக்கு முக்கியக் காரணம் என்பதை இது உறுதிப்படுத்துகிறது.
தாயின் இறப்பு தடுக்கக்கூடிய ஒன்றுதான் என்றாலும், உடல்நலம் குறித்த விழிப்புணர்வு இல்லாதது, உரிய நேரத்தில் மருத்துவ வசதி கிடைக்காதது ஆகியவற்றால் இவை தொடர்கின்றன. தரமான மருத்துவப் பராமரிப்பு இல்லாத நாடுகளிலும், தனிநபர் வருமானம் குறைவாக உள்ள நாடுகளிலும் தாய் இறப்பு விகிதம் அதிகமாக உள்ளது. உதாரணமாக, 2017இல் எடுத்த கணக்கெடுப்பின்படி, குறைந்த வருமானம் உள்ள வளரும் நாடுகளில், 45 பிரசவங்களில் ஒரு தாய் உயிரிழந்திருக்கிறார்; அதிக வருமானம் கொண்ட வளர்ந்த நாடுகளில் 5,400 பிரசவங்களில் ஒரு தாய் உயிரிழந்திருக்கிறார்.
இந்தியாவின் முன்னெடுப்புகள்: தடுக்கக்கூடிய குழந்தை இறப்புகளைக் குறைப்பதில் இந்தியா, நேபாளம், செனகல், கானா, புருண்டி ஆகிய ஐந்து நாடுகள் சிறப்பாகச் செயல்பட்டு வருவதாக ஐ.நா. பாராட்டியிருக்கிறது. குறிப்பாக, ஒவ்வொரு குடும்பத்துக்கும் வருடத்துக்கு ரூ.5 லட்சம் மருத்துவக் காப்பீடு வழங்குகிற ‘ஆயுஷ்மான் பாரத்’ திட்டத்தின் மூலம் இந்தியா லட்சக்கணக்கான இளம் உயிர்களைக் காப்பாற்றியிருப்பதாக ஐ.நா. சுட்டிக்காட்டியுள்ளது. மேலும், ‘பிரதான் மந்திரி சுரக் ஷித் மாத்ரித்வா அபியான்’ திட்டத்தின் (PMSMA) மூலம் கர்ப்பிணிகளுக்குப் பிரசவத்துக்கு முந்தைய சேவைகளைத் தரமாக வழங்கிப் பாதுகாப்பான பிரசவங்களை உறுதிப்படுத்தியுள்ளது.
மருத்துவர்களுக்கு மட்டுமல்லாமல், சமூகச் சுகாதாரப் பணியாளர்கள், உதவியாளர்கள் ஆகியோருக்கும் தொடர்ந்து துறைசார் திறன் மேம்பாட்டுப் பயிற்சிகள் அளிக்கப்படுகின்றன. குழந்தை பிறப்பு, இறப்பு, குழந்தையின் உடல்நலன் சார்ந்த குறியீடுகள் ஆகியவை எண்ணிம முறையில் கண்காணிக்கப்பட்டுத் தரவுகள் சேகரிக்கப்படுகின்றன. இவை குழந்தை இறப்பு விகிதத்தைக் குறைப்பதற்கான முன்னெடுப்புகளை மேம்படுத்த உதவுகின்றன. இவற்றின் மூலம் ஒவ்வோர் ஆண்டும் ஆரோக்கியமான முறையில் குழந்தைகள் பிறப்பதை இந்தியா உறுதிப்படுத்துகிறது என்கிறது ஐ.நா.
உதவிக்கு வந்த தடுப்பூசி: ஐந்து வயதுக்கு உள்பட்ட குழந்தைகள் தட்டம்மை பாதிப்பால் அதிகம் பாதிக்கப்பட்ட நாடாக 2000இல் இந்தியா இருந்தது. அப்போது இந்த நோய் பாதிப்பால் 1.89 லட்சம் குழந்தைகள் உயிரிழந்தனர். அந்த ஆண்டில், 56% குழந்தைகளுக்கு மட்டுமே தட்டம்மைத் தடுப்பூசி செலுத்தப்பட்டிருந்ததுதான் இதற்குக் காரணம். ஆனால், 2023இல் தட்டம்மைத் தடுப்பூசி செலுத்தப்பட்ட குழந்தைகளின் எண்ணிக்கை 96 சதவீதமாக அதிகரித்தது. இதன் பலனாக, தட்டம்மையால் உயிரிழந்த குழந்தைகளின் எண்ணிக்கை 5,200ஆகக் குறைந்தது.
முன்மாதிரி தமிழ்நாடு: கரோனாவுக்குப் பிந்தைய காலக்கட்டத்தில் தமிழ்நாட்டில் பிரசவகாலத் தாய் – சேய் இறப்பு விகிதம் வெகுவாகவே குறைந்துவருகிறது. 2021-22 புள்ளிவிவரப்படி, ஒரு லட்சம் பிரசவங்களில் 90 தாய்மார்கள் உயிரிழந்த நிலையில், 2022-23இல் இந்த எண்ணிக்கை 52 ஆகவும், 2023-24இல் 45 ஆகவும் குறைந்துள்ளது. இதுபோலவே, பச்சிளம் குழந்தைகள் இறப்பதும் குறைந்துள்ளது. 2022-23இல் உயிருடன் பிறந்த 1,000 குழந்தைகளில் 10 பேர் உயிரிழந்த நிலையில், 2023-24இல் இந்த எண்ணிக்கை 8 ஆகவும் குறைந்துள்ளது.
பிரசவத்தின்போது தாய் – சேய் இறப்பு முற்றிலும் இல்லை என்னும் நிலைமைக்குத் தமிழ்நாட்டின் மருத்துவக் கட்டமைப்புகளை மேம்படுத்துவதற்கான முன்னெடுப்பு நடவடிக்கைகளைத் தமிழ்நாடு அரசு தொடர்ந்து மேற்கொண்டுவருகிறது. இதை உறுதிப்படுத்தும் விதமாக நாட்டில் முதன்முறையாக விருதுநகர் மாவட்டம் தாய் இறப்பு இல்லாத மாவட்டமாக அறிவிக்கப்பட்டு உள்ளது. இங்கு 2023 ஏப்ரல் மாதம் முதல் 2024 மார்ச் மாதம் வரையிலான 7,991 பிரசவங்களில், உயிரிழப்பு எதுவும் இல்லை என்பது ஒரு வரலாற்றுச் சாதனையாகக் கருதப்படுகிறது.
வீட்டில் பிரசவம் தவிர்ப்போம்: தடுக்கக்கூடிய குழந்தை இறப்புகள் குறைந்துவருவது ஒரு சாதனைதான் என்றாலும், விருதுநகர் மாவட்டத்தைத் தொடர்ந்து தமிழ்நாட்டில் மற்ற மாவட்டங்களும், நாட்டில் மற்ற மாநிலங்களும் இதுபோன்ற உயிரிழப்புகள் நிகழ்வதை முற்றிலும் தடுப்பதற்கான வழிமுறைகளைத் தீவிரப்படுத்த வேண்டியது அவசியம்.
குறிப்பாக, போக்குவரத்து குறைவாக இருக்கிற இடங்களில் வசிக்கும் கர்ப்பிணிகளுக்கும், குழந்தைகளுக்கும் முறையாகத் தடுப்பூசி செலுத்துவது, ஊட்டச்சத்துமிக்க உணவு கொடுப்பது, பாதுகாப்பான குடிநீரை உறுதிசெய்வது, குழந்தைத் திருமணங்களைத் தடுப்பது, வீட்டில் பிரசவம் பார்ப்பதைத் தடுப்பது ஆகிய முன்னெடுப்புகள் முக்கியமானவை.
18 வயதுக்கு முன்னர் திருமணம் செய்துகொள்பவர்களின் எண்ணிக்கை கணிசமாகக் குறைந்துவிட்டாலும், நாடு முழுவதும் 27% பெண்கள் நிர்ணயிக்கப்பட்ட வயதுக்கு முன்பே திருமணம் செய்துகொள்கின்றனர். குடிநீரில் கழிவுநீர் கலப்பதும், தரமற்ற குடிநீர் விநியோகிக்கப்படுவதும் இன்றளவிலும் நடந்துகொண்டுதான் இருக்கின்றன.
சமீபத்தில் சென்னையில் குடிநீர் கலப்படத்தால் உயிரிழப்புகள் ஏற்பட்டதை இங்கே நினைவுகூரலாம். அடுத்ததாக, சமூக ஊடகங்களில் பகிரப்படுகிற ‘வீட்டிலேயே சுகப்பிரசவம் பார்ப்பது மனித உரிமை’ என்பது போன்ற போலி அறிவியல் செய்திகளுக்குத் தடை விதிப்பது காலத்தின் கட்டாயம்.
தமிழ்நாட்டில் மட்டுமல்லாமல், வீட்டில் பிரசவம் பார்த்ததன் காரணமாகக் கடந்த ஒன்பது மாதங்களில் ஒன்பது குழந்தைகள் இறந்துபோனதாகக் கேரளத்திலிருந்து வந்திருக்கும் செய்தி இதன் முக்கியத்துவத்தை உணர்த்துகிறது.
எனவே, கர்ப்பகாலத்தில் மூடநம்பிக்கைகளைக் கைவிடும் விதமாகவும், கர்ப்பிணிகளின் உடல்நலம் பேணுதல் தொடர்பாகவும் விழிப்புணர்வுப் பரப்புரைகளைத் தொடர்ந்து மேற்கொள்ள வேண்டும். அத்துடன், போதிய நிதி ஒதுக்கிச் சாமானியருக்கும் கடைநிலைப் பகுதியிலும் மருத்துவ வசதிகள் உரிய நேரத்தில் கிடைப்பதற்கு மருத்துவக் கட்டமைப்பை இன்னும் அதிக அளவில் விரிவுபடுத்துவதும் நாட்டில் பிரசவ இறப்புகளே இல்லை என்னும் இலக்கை எட்ட உதவும்.
ஏப்ரல் 7: உலக நலவாழ்வு நாள்
- தொடர்புக்கு: gganesan95@gmail.com