உங்களுக்கு ‘சிகேடி’ (CKD – Chronic Kidney Disease) நோய் குறித்துத் தெரிந்திருக்கும். அதாவது, நாள்பட்ட சிறுநீரக நோய். ‘சிகேஎம்’ நோய்த்தொகுப்பு (CKM Syndrome) தெரியுமா? இன்றைய புத்தியல்பு வாழ்க்கை முறையில் நம் ஆரோக்கியத்துக்கு வெடிவைக்கும் புதிய ஆபத்து இது.
2024ஆம் ஆண்டின் இறுதியில் அமெரிக்க இதயநலக் கழகம் (American Heart Association) ‘சிகேஎம்’ நோய்த்தொகுப்பு (CKM Syndrome) என்னும் புதிய வகை பாதிப்பு இளம் வயதினரிடமும் நடுத்தர வயதினரிடமும் அதிகமாகக் காணப்படுகிறது என்று தெரிவித்ததில் இருந்து இந்த நோய்த்தொகுப்பு மருத்துவர்கள் மத்தியில் அதிகக் கவனம் பெற்றுள்ளது.
நால்வர் கூட்டணி: உடல் பருமன், இரண்டாம் வகை சர்க்கரை நோய், சிறுநீரகப் பாதிப்பு, இதய பாதிப்பு இந்த நான்கும் இணைந்த ஒரு நோய்த்தொகுப்புக்குப் பெயர்தான் ‘சிகேஎம்’ நோய்த்தொகுப்பு. கடந்த ஆண்டுவரை ஒரு பயனாளிக்கு ஏற்பட்டிருக்கும் இந்த நான்கு வகை பாதிப்புகளும் தனித் தனி பாதிப்புகளாகவே கருதப்பட்டுவந்தன. தனித் தனிச் சிறப்பு மருத்துவர்களால் இந்தப் பாதிப்புகள் கையாளப்பட்டன.
இப்போது ‘இந்த நான்கும் தனித் தனி பாதிப்புகள் அல்ல’ என்று அமெரிக்க இதயநலக் கழகம் புதிதாக அறிவித்துள்ளது. ‘நான்கும் ஒன்றிணைந்த ஒரு கூட்டணி நோய்தான் இது; இந்த நான்கு பிரச்சினைகளையும் தனித் தனியாக எதிர்கொள்வதைத் தவிர்த்து, ஒருங்கிணைந்த சிகிச்சையால் எதிர்கொள்ள வேண்டும்’ என்றும் அக்கழகம் தெரிவித்திருக்கிறது.
ஆரம்பம் முதல் அகால மரணம் வரை: இந்தக் கூட்டணியின் அடிப்படை பாதிப்பு நம் உடல் எடையில் தொடங்குகிறது. இடுப்புச் சுற்றளவு அதிகரிப்பதும், வயிற்றில் கொழுப்பு சேர்வதும் இதன் ஆரம்பகால அறிகுறிகள். இவை விரைவிலேயே உடல் பருமனில் கொண்டுபோய் நிறுத்துகின்றன. உடல் பருமன் சர்க்கரை நோயைக் கொண்டுவருகிறது. இதைக் கட்டுப்படுத்தத் தவறும்போது ரத்தக்குழாய்கள் கடினமாகிவிடுகின்றன.
இப்போது இதயமானது மிகவும் சிரமப்பட்டு ரத்தத்தை உடலுக்குச் செலுத்த வேண்டி வருகிறது. இதனால் ரத்த அழுத்தம் அதிகரிக்கிறது. இந்த இரண்டும் இணைந்து ரத்தக் குழாய்களில் உள்காயங்களை (Inflammation) ஏற்படுத்துகின்றன. இந்த உள்காயங்களுக்கு கொலஸ்டிரால் வரும்போது அங்கே ரத்த உறைவுக் கரல் (Plaque) உண்டாகிறது. இந்தச் செயல்முறை இதயத்தில் நிகழ்ந்தால் மாரடைப்பு வருகிறது; மூளையில் நிகழ்ந்தால் பக்கவாதம் வருகிறது; சிறுநீரகத்தில் நிகழ்ந்தால் சிறுநீரகம் செயலிழக்கிறது.
அமெரிக்க இதயநலக் கழகத்தின் அறிவிப்பு வருவதற்கு முன்புவரை ஒரு நோயாளியின் சிறுநீரகப் பாதிப்பைத் தனியொரு பாதிப்பாகவே மருத்துவர்கள் கருதிவந்தனர். அதனால் சிறுநீரகச் சிறப்பு நிபுணர்களே இந்தப் பாதிப்பைச் சரிப்படுத்திவந்தனர். இப்போது இந்தப் பாதிப்பைச் சிறுநீரகச் சிறப்பு நிபுணர்களின் வழிகாட்டுதலில் இதயநலச் சிறப்பு மருத்துவர்கள் கவனிக்க வேண்டிய கட்டாயம் உருவாகியிருக்கிறது.
நோயாளி சிறுநீரகப் பாதிப்பைத் தனியாகப் பார்த்துக்கொள்ளட்டும் என்று இதயநல மருத்துவர்கள் ஒதுங்கிவிட முடியாது. காரணம், சிறுநீரகப் பாதிப்பினால் சிறுநீரக ரத்தக் குழாய்களில் உள்காயங்கள் ஏற்படும் சாத்தியம் அதிகரித்திருக்கிறது. இது சிறுநீரகச் செயல்பாட்டைக் குறைத்துவிடுகிறது. இதன் விளைவாக, சர்க்கரை நோய் கட்டுப்பட மறுக்கிறது. இதனால் மறுபடியும் ரத்தக் குழாய்களில் உள்காயங்கள் ஏற்படுகின்றன.
மறுபடியும் சிறுநீரகம் பழுதாகிறது. இது இதயத்தைப் பாதிக்கிறது. இப்படி ஒரு சங்கிலி வினைபோல் அடுத்தடுத்துச் சிறுநீரகம், ரத்தக் குழாய்கள், இதயம் ஆகியவை பாதிக்கப்படுவதால், மொத்த பாதிப்பும் கடைசியாக இதயத்தைத்தான் வந்தடைகிறது. இதன் விளைவால் பயனாளிக்குத் திடீர் உயிரிழப்பு ஏற்படுகிறது. அகால மரணத்துக்கு அது அடி கோலுகிறது. இந்த உலகளாவிய பிரச்சினை, இப்போது இந்தியாவிலும் பிரதிபலிக்கிறது.
முக்கியத்துவம் என்ன? - உதாரணத்துக்கு, தேசியக் குடும்பநல ஆய்வின்படி (National Family Health Survey - 2019-21) தமிழ்நாட்டில் 19 வயதுக்கும் 49 வயதுக்கும் இடைப்பட்டவர்களில் 40.3% பேருக்கு உடல் பருமன் இருக்கிறது. 16.1% பேருக்குச் சர்க்கரை நோய் இருக்கிறது. 24% பேருக்கு உயர் ரத்த அழுத்தம் இருக்கிறது. இந்த மூன்றையும் சரியாகக் கவனிக்காவிட்டால் அடுத்ததாகச் சிறுநீரகம் பாதிக்கப்படப்போவது உறுதி.
ஏற்கெனவே சிறுநீரகப் பாதிப்பு உள்ளவர்களோடு இந்தப் புதிய பாதிப்பு உள்ளவர்களும் சேர்ந்துவிடுவார்கள். அப்போது ‘சிகேஎம்’ நோய்த்தொகுப்பின் தாக்கம் மிகவும் வலுத்துவிடும். இளம் வயது – நடுத்தர வயது அகால மரணங்களைத் தடுக்க முடியாமல் போய்விடும்.
2030க்குள் தொற்றா நோய்களினால் ஏற்படும் உயிரிழப்புகளை மூன்றில் ஒரு பங்காகக் குறைப்பதே ஐக்கிய நாடுகள் அவையின் நிலையான வளர்ச்சி இலக்காக இருக்கும்போது, உடல் பருமன், சர்க்கரை நோய், உயர் ரத்த அழுத்தம் உள்ளிட்ட தொற்றா நோய்களின் ஆதிக்கம் அதிகரிப்பது நாட்டின் ஒட்டுமொத்தப் பொருளாதாரத்திலும் பாதிப்பை ஏற்படுத்தும்; சுகாதாரக் கட்டமைப்புக்கும் பெரும் சுமையை உண்டாக்கும். ஆகவே, ‘சிகேஎம்’ நோய்த்தொகுப்பை எதிர்கொள்ள தேசிய அளவில் ஒரு புதிய அணுகுமுறை தேவைப்படுகிறது என்கிறது, சர்வதேச நோய்ச்சுமை ஆய்வு நிறுவனம் (Global Burden of Disease Organization).
என்ன செய்ய வேண்டும்? - அமெரிக்க இதயநலக் கழகம் ‘சிகேஎம்’ நோய்த்தொகுப்புக்கு என சர்வதேச அளவில் ஒருங்கிணைந்த பராமரிப்புத் திட்டம் அவசியம் என்று அண்மையில் அறிவித்திருக்கிறது. சர்க்கரை நோய், உயர் ரத்த அழுத்தம், இதய நோய், சிறுநீரக நோய் என ஒவ்வொன்றையும் தனிமைப்படுத்திப் பார்ப்பதற்குப் பதிலாக, அவற்றை ஒரு பரந்த வளர்சிதை மாற்ற நிலையின் அறிகுறிகளாகச் சுகாதார வல்லுநர்கள் கருத வேண்டும் என்று அந்தக் கழகம் வழிகாட்டுகிறது. மேலும், இந்த நோய்க்குரிய ஆபத்துக் காரணிகளை ஒருங்கிணைந்து நிர்வகிப்பதற்குத் திட்ட வரையறை வகுக்கப்பட வேண்டியது காலத்தின் கட்டாயம் என்கிறது அக்கழகம்.
சிக்கல்கள் என்னென்ன? - இன்றைய மருத்துவ சிகிச்சை நடைமுறையில் ஒரு நோயாளியின் ‘சிகேஎம்’ நோய்த்தொகுப்பை முழுமையாகப் புரிந்துகொள்வதில் சிக்கல்கள் இருக்கின்றன. நோயாளிக்கு ஏற்பட்டுள்ள பல உறுப்புச் சிக்கல்களுக்கு சிகிச்சை பெறப் பல்வேறு சிறப்பு நிபுணர்களைத் தனித் தனியாக வெவ்வேறு நேரங்களில் வெவ்வேறு நகரங்களில் பார்க்க நேரிடுகிறது. இதனால் சிகிச்சைக்குரிய ஒருங்கிணைப்பில் பிரச்சினை ஏற்படுகிறது.
சிகிச்சையில் தனித் தனிப் பராமரிப்புதான் கிடைக்கிறது. இதனால் நோயாளிக்கு வழங்கப்படும் மருந்து இடைவினைகளில் பிரச்சினை ஏற்படுகிறது. ரத்தப் பரிசோதனைகளுக்காகவும் சிகிச்சைக்காகவும் நோயாளிகள் பலமுறை மருத்துவமனைக்கு வந்துசெல்ல வேண்டியிருக்கிறது. இதனால் நோயாளிக்குச் செலவு இரட்டிப்பாகிறது; நேர இழப்பும் ஊதிய இழப்பும் உற்பத்தி இழப்பும் ஏற்படுகின்றன.
ஒருங்கிணைந்த மருத்துவமனை தேவை - ஒரே இடத்தில் சர்க்கரை நோய் நிபுணர், இதயநலச் சிறப்பு மருத்துவர், சிறுநீரகநலச் சிறப்பு மருத்துவர், உணவியல் நிபுணர், இயன்முறை மருத்துவர் ஆகியோர் அடங்கிய ஒரு குழு இணைந்து பணியாற்றுவதன் மூலம் ‘சிகேஎம்’ நோய்த்தொகுப்புப் பிரச்சினைக்குத் தீர்வு காணலாம்.
கடைநிலைப் பராமரிப்பு (Tertiary care) நிலையங்களில், ஒருங்கிணைந்த மருத்துவமனை (Integrated clinic) அமைத்தும் இந்தப் பிரச்சினைகளைத் தீர்க்க முடியும். நாட்டில் போதிய நிதி ஒதுக்கப்பட்டால், இந்த வசதிகளை முதல்நிலை (Primary care), இரண்டாம் நிலை (Secondary care) ஆகிய மருத்துவப் பராமரிப்பு மையங்களுக்கும் விரிவுபடுத்த முடியும்.
தமிழ்நாட்டில் உள்ளதுபோல் ‘மக்களைத் தேடி மருத்துவ’முறையின் மூலம் மருத்துவ உதவிப் பணியாளர்களை நோயாளியின் வீட்டுக்கே அனுப்பி, உடல் எடை சரிபார்ப்பது, ரத்த அழுத்தத்தை அளப்பது, ரத்தச் சர்க்கரை அளவைக் கணிப்பது, சிறுநீரைப் பரிசோதிப்பது போன்றவற்றின் மூலம் ‘சிகேஎம்’ நோய்த்தொகுப்புக்கு அதிகச் சாத்தியம் உள்ளவர்களை ஆரம்பத்திலேயே அடையாளம் காண முடியும்.
அப்படி அறிகுறிகள் ஆரம்பநிலையில் இருக்கிற நோயாளிகளை முதல் நிலை அல்லது இரண்டாம் நிலை மருத்துவப் பராமரிப்பு நிலையங்களுக்குப் பரிந்துரைத்து, இந்த நோய்த் தொகுப்பைக் கட்டுப்படுத்த முடியும். இதன் மூலம் கடைநிலைப் பராமரிப்பு மையங்களின் சுமையைக் குறைக்க முடியும். பயனாளியின் அகால மரணத்தைத் தடுக்க முடியும். மத்திய, மாநில அரசுகள் இதில் உடனே கவனம் செலுத்த வேண்டும்.
- தொடர்புக்கு: gganesan95@gmail.com