நம்முடைய நாட்டில் துரதிர்ஷ்டவசமாக அறிவியல் கல்வி என்று சொன்னால் கைகளால் செய்து பார்க்கும் செயல்பாடுகளுக்குப் பெரிய மதிப்புக் கொடுப்பதில்லை. ஒரு பேச்சாக, தத்துவமாக அல்லது ஒரு கருத்துருவாகச் சொல்வதை மட்டும்தான் நாம் அறிவியல் என்று நினைத்துக் கொண்டிருக்கிறோம். அதாவது ஆங்கிலத்தில் Theoretical Science என்று சொல்லுவார்கள். அதாவது கோட்பாடு அளவிலான அறிவியல். இதைத்தான் அறிவியல் என்று நாம் நினைத்துக் கொண்டிருக்கிறோம்.
செய்து பார்த்தல் போன்ற விஷயங்களை நாம் பள்ளிப் பாடப்புத்தகங்களில் வைத்தால் கூட, அவை எல்லாம் ஒரு Demonstration - செய்து காட்டுதல் என்ற அளவில் மட்டுமே நடைபெறுகின்றன. நமது கைகளால் பல்வேறு செயல்பாடுகளை மிகவும் நுணுக்கமாக செய்து பார்ப்பதுதான் அறிவியல் கல்வி கற்றலில் மிகவும் முக்கியமான அம்சம்.
இதனை நாம் கவனத்தில் கொள்வதே இல்லை. அறிவியல் கல்வியியல் பார்வையில் செய்து காட்டல் என்பது வேறு; செய்து பார்ப்பது என்பது வேறு. இரண்டும் ஒன்றல்ல. பெரும்பாலும் இங்கு செய்து காட்டல் மட்டுமே நடைபெறுகிறதே தவிர, செய்து பார்த்தல் நடைபெறுவது இல்லை.
‘கைகளால் வேலை செய்பவர்கள் தாழ்ந்தவர்கள் - மூளையால் வேலை செய்பவர்கள் தான் உயர்ந்தவர்கள்’ என்ற பொதுக்கருத்து நம்முடைய சமுதாயத்தில் இருக்கக்கூடிய மனநிலை. அறிவியல் கல்வி கற்றலிலும் இதன் பின்னணி உள்ளதை நாம் புரிந்துகொள்ள முடியும்.
இந்தப் பொதுக்கருத்தை அறிவியல் கல்விக்குள்ளேயும் நம்மை அறியாமலேயே நாம் புகுத்தி விட்டோம். இந்தக் கருத்தைக் களைய வேண்டும் என்று அறிவியல் கல்வி மீது ஆர்வம் கொண்ட அனைவரும் கூறி வருகின்றனர். அறிவியலாளர்கள் அனைவரும இந்திய அறிவியலினுடைய மிகப்பெரிய சவால் என்று சொல்லக்கூடியவற்றில் மிக முக்கியமான பிரச்சினையாக இதனைக் குறிப்பிடுகின்றனர்.
நாம் ஓர் ஆய்வைச் செய்ய வேண்டும் என்றால் நமக்கு ஆய்வுக்கான கருவி தேவை. அந்த ஆய்வுக் கருவி எங்கேயோ, யாரோ செய்து வைத்திருக்க மாட்டார்கள். நாம்தான் அந்தக் கருவியை உருவாக்க வேண்டும். கடைகளுக்குச் சென்று கருவியை வாங்க முடியாது. அம்மீட்டர் (Ammeter) போன்ற கருவிகளையெல்லாம் கடைகளில்தானே வாங்குகிறார்கள் என்று சிலர் நினைக்கலாம். ஆம், அதை கடைகளில் வாங்குவார்கள்தான்.
ஆனால் முதன்முதலில் அந்தக் கருவியைக் கண்டுபிடித்தது எப்படி? அதை முதலில் எப்படித் தயாரித்தார்கள்? என்பதை நாம் புரிந்து கொள்ள வேண்டும். அதாவது நாம் ஒரு புது விஷயத்தை ஆராய்ச்சி செய்ய வேண்டுமென்றால், அதற்கு வேண்டிய நுணுக்கமான கருவியை நம்முடைய பரிசோதனைக் கூடத்திலேயே நாமே உருவாக்க வேண்டும்.
அறிவியலில் அது முக்கியமான ஒரு திறன். அப்படிப்பட்ட திறனை வளர்ப்பதற்கான பல முயற்சிகள் அவசியம். அம்மீட்டர் மட்டுமல்ல; நாமே செய்து பார்த்து கண்டறியும் திறன்கள் காரணமாகவே, இன்று நாம் பயன்படுத்தும் அனைத்துக் கருவிகளும் உருவாக்கப்பட்டிருக்கின்றன என்பதை நாம் நினைவில் கொள்ள வேண்டும்.
அத்தகைய திறன்களை நம் மாணவர்கள் மத்தியில் வளர்த்தெடுக்கும் நோக்கில் உருவாக்கப்பட்டுள்ள ‘ஹாண்ட்ஸ் ஆன் அஸ்ட்ரானமி – வகுப்பறையில் அறிவியல்’ என்ற நூலை மிகச் சிறந்த நூலாக நான் கருதுகிறேன். அறிவியல் கல்வி கற்றலில் வானியல் நிகழ்வுகளை உற்றுநோக்குதல் என்பது மிகவும் முக்கியமான ஓர் அம்சம்.
பல்வேறு வானியல் நிகழ்வுகள் பற்றி மிகவும் எளிதாகப் புரிந்து கொள்ளும் வகையில் நூலாசிரியர் மா.ஜெகதீஸ்வரன் இந்த நூலில் பல செயல்பாடுகளை விளக்கியுள்ளார். பெரிய அளவில் பொருட்செலவு இல்லாமல், நம்மிடம் இருக்கக்கூடிய பொருட்களை மட்டுமே பயன்படுத்தி, பல்வேறு செயல்பாடுகளை மிக எளிமையாக செய்து பார்த்து, புரிந்து கொள்வது பற்றி இந்த நூலில் விளக்கப்பட்டுள்ளது.
நான் ஏற்கெனவே குறிப்பிட்டது போல், கைகளால் செய்து பார்ப்பது என்பது அறிவியல் கல்வி கற்றலில் மிகவும் முக்கியமான ஒரு விஷயம். அதற்கான சுவாரசியமான பல செயல்பாடுகளை நூலாசிரியர் இந்த நூலில் தொகுத்துத் தந்துள்ளார். இந்த நூலில் கூறப்பட்டிருக்கும் செயல்முறைகளை எப்படிச் செய்வது என்பதை நாம் முதலில் கற்றுக் கொள்ள வேண்டும். குறிப்பாக ஆசிரியர்கள் மற்றும் அறிவியல் கல்வி பரப்புவதில் ஆர்வம் உள்ள அனைவரும் இந்தச் செயல்முறைகளை தாமாக செய்து பார்க்க வேண்டும்.
முதல் முறை செய்யும்போது சில தவறுகள் ஏற்படலாம். மீண்டும் மீண்டும் செய்து பார்க்கும்போது அந்தச் செயல்முறையை நாம் தெளிவாகப் புரிந்து கொள்ள முடியும். அதன் பின்னர் மாணவர்களிடம் இந்த செயல்முறைகளை செய்து பார்க்கக் கற்றுக் கொடுக்க வேண்டும். இன்றையப் பள்ளிக்கல்விச் செயல்பாடுகளில் இத்தகைய முயற்சிகள் மிக மிக அவசியம்.
பள்ளிக்கல்விக்கு வெளியே அறிவியல் இயக்கங்கள் போன்ற பல்வேறு இயக்கங்கள் மூலமாக, பல செயல்பாட்டாளர்கள் செயல்படுகிறார்கள். அவர்களுக்கெல்லாம் மாணவர்களோடு உரையாடும் வாய்ப்பு கிடைக்கிறது. அத்தகையத் தருணங்களில் இந்த நூலில் விளக்கப்பட்டுள்ள செயல்பாடுகள் உட்பட, கைகளால் செய்து பார்க்கக்கூடிய பல செயல்பாடுகளைச் செய்து காட்ட வேண்டும்.
முக்கியமாக மாணவர்கள் தாமாகவே செய்து பார்க்கக் கற்றுக் கொடுக்க வேண்டும், அவர்களாகவே செய்து பார்க்கும்போது ஏற்படும் பல சிக்கல்களைக் களைவதற்கு உதவ வேண்டும். அத்தகைய திறன்களை வளர்க்க ஜெகதீஸ்வரன் எழுதியுள்ள இந்த நூல் பெரிதும் உதவும். அறிவியல் கல்வியில் ஆர்வம் கொண்ட அனைவரும் அவசியம் படிக்க வேண்டிய நூல்.
ஹாண்ட்ஸ் ஆன் அஸ்ட்ரானமி
(வகுப்பறையில் வானவியல்)
ம.ஜெகதீஸ்வரன்
ஜெ.எஸ்.ஆர். பதிப்பகம் மற்றும் சுட்டி மீடியா
விலை: ரூ.300
தொடர்புக்கு: 91501 33336
- தொடர்புக்கு: tvv123@gmail.com