ஒவ்வொரு நாட்டுக்கும் தேசிய கீதம் இருக்கும். தேசியப் பறவை, தேசிய மிருகம் என்பனவும் இருக்கும். தேசிய நாவல் இருக்குமா? அஜர்பைஜானில் இருக்கிறது. ரஷ்யாவுக்கும் ஈரானுக்கும் இடையில் அமைந்திருக்கும் நாடு அஜர்பைஜான். இது சோவியத் ஒன்றியத்தின் அங்கமாய் இருந்தது. சோவியத் வீழ்ச்சிக்குப் (1991) பிறகு தனி நாடானது.
இந்த நாவலின் கதை அதற்கெல்லாம் வெகு காலம் முன்பு முதல் உலகப் போர் (1914-1918) காலக் கட்டத்தில் நடக்கிறது. ஜார் மன்னரின் ஆட்சிக் காலத்தில், ரஷ்யாவின் ஆளுகையின் கீழ் இருந்தது அஜர்பைஜான். அங்கு ஒரு பள்ளிக்கூடத்தில் ‘அலியும் நினோவும்’ சந்தித்துக்கொள்கிறார்கள்.
அலி கான் ஷிர்வான்ஷிர், ஒரு அஜர்பைஜானி இளைஞன். முகமதியன். செல்வக்குடியில் பிறந்தவன். அவனது முன்னோர் போர்க்களத்தில் வீரமரணம் அடைந்தவர்கள். நினோ கிபியானி, அண்டை நாடான ஜார்ஜியப் பெண். கிறிஸ்துவள். ஓர் அரச குடும்பத்தில் பிறந்தவள்; இளவரசி. நினோவிற்கு மரங்கள் பிடிக்கும். அவை ‘நிறைவாழ்வின் உருவகங்கள்’. மாறாக அலி பாலைவனத்தை நேசிப்பவன்.
அலி தரையில் அமர்ந்து உணவு உண்பவன். ஆனால், நினோ மேசையில் அமர்ந்து கத்தி, முள்கரண்டியுடன் சாப்பிடுபவள். அவள் அலியிடம் ஆசியத்தன்மை இருப்பதாகச் சொல்கிறாள். அப்படிச் சொல்வதற்கு அவளிடமிருக்கும் ஐரோப்பியத்தன்மைதான் காரணம். ஜார்ஜியா ஐரோப்பாவின் வாசலாக இருக்கிறது. ஆனாலும் அந்த இரண்டு இளம் உள்ளங்களும் காதல் வயப்பட இவை எதுவும் தடையாக இல்லை.
ஆனால், காதல் கைகூடுவதற்கு ‘மதம், வளர்ப்பு, வம்சாவளி வேறுபாடுகள்’ தடையாக இருக்கின்றன. நினோ, மதம் மாறச் சம்மதிக்கவில்லை. எனினும் இந்தத் தடைகளைக் காதலர்களால் தாண்ட முடிகிறது. ‘இரண்டு முதன்மைக் குடும்பங்களிடையே கலப்புத் திருமணம்’ நடத்தத் தந்தைமார் சம்மதிக்கின்றனர். ஆனால், கதை இந்த இடத்தில் முடிவதில்லை.
1917இன் ரஷ்யப் புரட்சி அஜர்பைஜானையும் புரட்டிப்போடுகிறது. அந்தப் புரட்சியால் நிலை தடுமாறிய ரஷ்யாவிடமிருந்து அஜர்பைஜான் விடுதலை பெற்று, 1918இல் அஜர்பைஜான் ஜனநாயகக் குடியரசு என்று பெயர் சூட்டிக்கொள்கிறது. ஆனால், அது அதிக காலம் நீடிக்கவில்லை. சோவியத் ரஷ்யா 1920இல் அஜர்பைஜான் மீது படையெடுத்து அந்த நாட்டை மீண்டும் ரஷ்யாவுடன் இணைத்துக்கொள்கிறது.
இந்தப் போர்களும் அரசியல் மாற்றங்களும் உறவுகளைச் சோதனைக்கு உள்ளாக்குகின்றன. ஒரு நண்பன் துரோகம் இழைக்கிறான். அதற்கான சம்பளத்தை அலி வழங்குகிறான். குடும்பங்களுக்குள் ‘ரத்தப் பகை’ உருவாகிறது. அலி ஒரு மலைக்குகை கிராமத்தில் கரந்துறைகிறான். நினோ பின் தொடர்கிறாள்; மணமுடிக்கிறார்கள்.
கதை வேகம் பிடிக்கிறது. அலியும் நினோவும் அண்டை நாடான பாரசீகத்திற்கு (ஈரான்) இடம் பெயர்கிறார்கள். அஜர்பைஜான் மீதான முற்றுகை தளர்கிறது. நாடு திரும்புகிறார்கள். ஆனால் விரைவில் ரஷ்யா, அஜர்பைஜான் மீது படையெடுக்கிறது. நினோவைக் குட்டி மகளுடன் ஜார்ஜியா போகும் ரயிலில் ஏற்றியனுப்புகிறான் அலி.
அவன் போகவில்லை. யுத்த பூமியைவிட்டு ஒரு போர் வீரனால் எப்படிப் போக முடியும்? பயணிதரன் தனது மொழிபெயர்ப்பின் வாயிலாக மூலத்தின் ஆன்மாவையும் வசீகரத்தையும் ஒவ்வொரு வரியிலும் தக்கவைத்துள்ளார். இந்தக் கதை போரையும் காதலையும் மட்டுமல்ல, ஒரு காலகட்டத்தின் இனவரைவியலையும் வாழ்க்கையையும் உள்ளடக்கியிருக்கிறது.
ஒட்டகங்கள் அளவான அடிகளுடன் தலையை ஆட்டியபடி செல்கின்றன. குதிரைகள் நீண்ட சீரான அடிகள் வைத்து வேகமாக ஓடுகின்றன. ஆசியப் பெண்கள் உள்முற்றங்களைத் தாண்டுவதில்லை. ஐரோப்பியப் பெண்கள் வரவேற்பறைகளில் வெள்ளைக் கையுறை அணிந்து விருந்தினருடன் கை குலுக்குகிறார்கள்.
போர் வீரர்கள் எதிரிகளின் கண்களில் கண்ணீரைப் பார்க்க ஆசைப்படுகிறார்கள். தொன்மங்களும் சடங்குகளும் பண்பாட்டுக் கூறுகளும் நாவலின் ஊடும் பாவுமாக நெய்யப்பட்டிருக்கின்றன. இது ஏன் தேசிய நாவல் என்று கொண்டாடப்படுகிறது என்பது இதை வாசித்து முடிக்கும்போது விளங்குகிறது.
அலியும் நினோவும்
குர்பான் சையத் (தமிழில்: பயணி தரன்)
காலச்சுவடு பதிப்பகம்
விலை: ரூ.370
தொலைபேசி: 04652 278525
- தொடர்புக்கு: mu.ramanathan@gmail.com