இலக்கியம், மெய்யியல், கோட்பாடுகள் ஆகியவை குறித்து ஜமாலன் எழுதிய பத்து கட்டுரைகளின் தொகுப்பு இந்நூல். ‘தமிழ்ச் சிறுவாரி மரபும் உடலரசியல் முதலீடுகளும்’, ‘நவீன தமிழ் இலக்கியத்தில் தேசிய, திராவிட, இடதுசாரிச் சொல்லாடல்களும், மரபுகளும்’, ‘தமிழ் நவீனத்துவ மரபில் பாரதியும் பாரதிதாசனும்’ உள்ளிட்ட கட்டுரைகள் இடம்பெற்றுள்ளன.
பொதுப்புத்தி சார்ந்து அறியாமையில் தனது அறிவு மறுப்புவாதத்தையே பின்நவீனத்துவம் எனத் தமிழ்ச்சூழல் முன்வைக்கிறது என்று கூறும் ஜமாலன், தமிழ்ச்சூழலில் எது புரியவில்லையோ அதுவே பின்நவீனத்துவம் என்பது பொதுப்புத்தி சார்ந்த புரிதலாக உள்ளது என்கிறார்.
ஆகவே, பின்நவீனத்துவம் தமிழ்ச்சூழலில் அறிமுகப்படுத்தப்பட்ட வரலாற்றை ‘தமிழ்சூழலில் பின்நவீனத்துவம்’ என்ற கட்டுரை மூலம் விவரித்துள்ளார். தமிழ்ச்சூழலில் பின்நவீனத்துவம் பண்பாட்டுத் தளத்தில் புனிதக் கவிழ்ப்பாகவும், இலக்கியத் தளத்தில் புரியாமல் எழுதுவதாகவும், அரசியல் தளத்தில் வெறும் அடையாள அரசியல் என்றும் புரிந்துகொள்ளப்பட்டிருக்கிறது என்கிறார்.
அமைப்பியல், பின்அமைப்பியல், பின்நவீனத்துவம் ஆகிய மூன்றிற்கும் இடையேயான வித்தியாசங்களையும், இந்த மூன்று கோட்பாடுகளும் தமிழ்ச்சூழலில் அறிமுகமான வரலாறு பற்றியும் அவரது இந்தக் கட்டுரை அலசுகிறது. கணிப்பொறி சார்ந்த உலகாக மாறிவிட்ட இன்றைய சூழலில், அனைத்துமே டிஜிட்டல்மயமாகி வரும் நிலையில், நம்முடைய ஒவ்வொரு அசைவும் இந்த டிஜிட்டல்களால் தீர்மானிக்கக்கூடிய நிலை வரலாம்.
இனி உலகப் பொருளாதாரம் என்பதே இந்த டிஜிட்டல் பொருளாதாரம்தான். ஆகவே, தகவல் வங்கிகளைத் தங்கள் கைகைகளில் வைத்திருக்கும் பெரும் நிறுவனங்களும் நாடுகளுமே இனி உலகில் ஆதிக்கத்தைச் செலுத்தும் எனப் பின்நவீனத்துவம் கூறும் கணிப்புகள் பற்றி கூறப்பட்டுள்ளது.
பின்நவீனத்துவம் முன்வைத்த முக்கியமான கருத்தாக்கங்கள், இந்தக் கோட்பாடு பற்றி விரிவாக ஆராய்ந்த உலகின் முக்கியமான சிந்தனையாளர்கள் பற்றியெல்லாம் அறிமுகம் செய்யப்பட்டுள்ளது. பன்முகப்பட்ட அறவியலை, அரசியலை, அழகியலை ஒற்றை அதிகாரத்திற்கு எதிராக முன்வைக்கும் ஒரு கலகக்குரலாக, கோட்பாடாக, ஆய்வுமுறையாக, சிந்தனையாகத் திகழ்வதே பின்நவீனத்துவம் என இந்தக் கட்டுரை கூறுகிறது.
தொ.பரமசிவன் எழுத்துகளை எப்படி வாசிப்பது? அவரது எழுத்துகளின் பின்னுள்ள கோட்பாடு என்ன? என்பது பற்றி விளக்கும் நோக்கில் எழுதப்பட்ட ‘தொ.ப.வின் பிரதியாக்கம் - ஒரு பண்பாட்டுப் பொருள்முதல்வாத அணுகுமுறை’ என்ற கட்டுரையும், தொ.ப.வின் மார்க்சியத் திராவிடப் புரிதலை தமிழியம் சார்ந்த ஒரு சிந்தனையாகப் புத்தாக்கம் செய்து கொண்டு வாசிக்க முடியும் என்று கூறும் ‘தொ.ப.வின் தமிழியம் தழுவிய பண்பாட்டுப் பொருள்முதல்வாதம்’ என்ற மற்றொரு கட்டுரையும் இந்நூலில் இடம்பெற்றுள்ளன.
இவை தவிர, பக்தி இலக்கியமும் இயக்க பக்தியும் - கோ.கேசவனின் மார்க்சியத் திறனாய்வு, இடதுசாரித் திராவிடத் தமிழியக்க முன்னோடி கவிஞர் தமிழ் ஒளி, பின்காலனிய நிலையில் ‘தான், பிற, தன்னிலையாதல்’, பொதியின் மெய்யியல் சார்ந்த உரையாடல்கள் ஆகிய கட்டுரைகளுடன் உள்ள இந்நூல், தமிழ்ச் சூழலில் கோட்பாட்டு உரையாடல் பற்றிய சிந்தனைகளை வளர்க்கும் வகையில் எழுதப்பட்டுள்ளது.
தமிழ்ச் சூழலில் கோட்பாடுகளும் பின்நவீனத்துவமும்
ஜமாலன்
மணல் வீடு வெளியீடு
விலை ரூ.200
தொடர்புக்கு: 98946 05371