மென்மையான நடையும் கூர்மையான பார்வையும் கேட்கும்திறனும் கொண்டவை பூனைகள். நுட்பமான மொழியாற்றலைக் கொண்டுள்ளன.

இரவில் மின்னும் கண்கள், நுனி வரை நிமிரும் வால், மென்மையான நடை, விளையாட்டு என இவை ஒவ்வொன்றும் தகவல் பரிமாற்றம்.  
 

உங்கள் பூனை உங்களைப் பார்த்துக் கண் சிமிட்டுகிறதா? அது உங்களிடம், ’நான் உன்னை நேசிக்கிறேன்’ என்று சொல்கிறது!

வாலை நேராக நிமிர்த்திக்கொண்டு வருகிறதா? அது அன்பான வணக்கம். குறுக்காக வாலை ஆட்டுகிறதா? ’மிகவும் சந்தோஷமாக இருக்கிறேன்’ என்று அர்த்தம்.
 

ஜப்பானிய ஆராய்ச்சியாளர்கள், பூனைகளின் 'மியாவ்' ஒலிக்குப் பதினாறுக்கும் மேற்பட்ட வெவ்வேறு அர்த்தங்கள் உள்ளன என்பதைக் கண்டறிந்துள்ளார்கள்.

நாம் கேட்கும் சாதாரண மியாவ் ஒலி, உணவு கேட்கும் வேண்டுகோளாகவோ அன்பின் வெளிப்பாடாகவோ கவலையின் பகிர்வாகவோ இருக்கலாம். 
 

வால் அசைவுகளின் மொழியும் மிகவும் சுவாரசியமானது. நேராக நிமிர்ந்த வால், நட்பு. குறுக்காக அசைந்தாடும் வால், பேரானந்தம். கோபத்தில் புடைத்த வால் எச்சரிக்கை. 
 

பூனைகள் தங்கள் வாசனையைப் பொருள்களில் தேய்க்கும்போது, அந்த வாசனை குறைந்தது மூன்று மாதங்கள் வரை நீடிக்கிறது. 
 

இந்த வாசனை மற்ற பூனைகளுக்கு அந்தப் பகுதியில் எந்தப் பூனை வசிக்கிறது, அது எப்போது அங்கு வந்தது போன்ற பல முக்கியத் தகவல்களை வழங்குகிறது.

வியக்கத்தக்க வகையில் பூனைகள் மனிதர்கள் பேசும் மொழியில் நூறுக்கும் மேற்பட்ட வார்த்தைகளின் பொருள்களைப் புரிந்துகொள்ளும் திறன் கொண்டவை. | தகவல்கள்: நஸீமா ரஸாக்