சேலம் மாவட்டத்தில் ஆடி மாதம் முதல் நாளில் கொண்டாடப்படும் ‘தேங்காய் சுடும்’ பண்டிகையில் தயாராகும் ’சுட்ட தேங்காய்’ மருத்துவக் குணங்களில் மேன்மையானது.

சுவையோ சுண்டி இழுக்கும் தன்மையுடையது.  தேங்காய்ப் பண்டிகையின் சாரத்தையும் ஊட்டத்தையும் அனைவரும் எடுத்துக்கொள்ளலாம்.

எப்படித் தயாரிப்பது? - தேங்காயின் மேல் இருக்கும் நாரை நீக்கிவிட்டு, தேங்காயின் கண்களைத் துளைத்து, உள்ளிருக்கும் நீரை வெளியேற்ற வேண்டும்.

பச்சரிசி, அவல், பொட்டுக்கடலை, எள், பாசிப்பயிறு ஆகியவற்றை வாணலியில் வறுத்துக்கொள்ளவும். இவற்றோடு நாட்டுவெல்லம் சேர்த்து மிக்ஸியில் பொடித்துக்கொள்ளவும்.

பொடித்த பொருள்களைத் தேங்காயின் துளைக்குள் செலுத்த வேண்டும்.

பின்னர் தேங்காய்த் தண்ணீரைச் சேர்க்க வேண்டும்.

வேம்பு மர குச்சியைத் தேர்ந்தெடுத்து, ஒரு முனையைக் கூர்மையாகச் சீவி தேங்காயின் துளைக்குள் பொருந்துமாறு செருக வேண்டும்.

நெருப்பில் வாட்டும் போது தேங்காய் கழன்றுவிடாமல் இருக்கும்படி குச்சியை நன்றாகப் பொருத்த வேண்டும்.

உலர்ந்த குச்சிகளைக் கொண்டு, மண் அடுப்பில் தீ மூட்டி தேங்காயைச் சுட வேண்டும்.
 

தேங்காயை வலமும் இடமும் முன்னும் பின்னும் எனச் சுழற்றிச் சுழற்றி தீயில் வாட்ட, தேங்காயின் முழுப் பகுதியும் நன்றாக வேகத் தொடங்கும்.
 

தேங்காய் வெந்ததும் நெருப்பிலிருந்து எடுத்த சுட்ட தேங்காயை நன்றாக ஆற வைத்து, சுத்தியல் கொண்டு ஒட்டைத் தட்டி திறக்க வேண்டும்.

உள்ளே சேர்த்த உணவுப் பொருள்களின் கலவை தேங்காயோடு சேர்த்து வெந்து சிறப்பானஉணவுப் பண்டமாக மாறியிருக்கும். வாசனையோ கமகமக்கும்!
 

பயன்கள்: எள், நாட்டு வெல்லம், அவல் இவை இரும்புச் சத்தை வாரிவழங்கும். பொட்டுக் கடலையும் பாசிப்பயிறும் புரதத் தேவைக்குத் துணை நிற்கும்.

பல்வேறு நோய்களையும் குறிப்பாக, வாய்ப் புண், வயிற்றுப் புண்களைப் போக்கும் சக்தியும் சுட்ட தேங்காய்க்கு உண்டு. | தகவல்கள்: டாக்டர் வி.விக்ரம்குமார்