Gym workout or walking
வாழ்வியல்
ஜிம் பயிற்சியா, நடைப்பயிற்சியா?
எடை தூக்குவது, ‘ஜிம்’ பயிற்சிகளை மேற்கொள்வதால் உடலில் தசைகள் வலுப்பெறும். உடல் கட்டமைப்பு அழகு பெறும். எலும்புகளின் அடர்த்தி அதிகரிக்கும். எலும்பு மூட்டுகள் வலுப்பெறும்.
தொடர்ந்து ‘ஜிம்’ பயிற்சிகளைச் செய்துவரும்போது, தசைகளில் குளுக்கோஸ் அதிகமாகச் சேமிக்கப்படும். உடலுக்கு அதிக ஆற்றல் கிடைக்கும். சோர்வு இருக்காது.
மாறாக நடைப்பயிற்சி, நீச்சல், சைக்கிள் ஓட்டுதல் போன்ற காற்றலைப் பயிற்சிகளைச் (Aerobic Exercises) செய்யும்போது இதயத்துடிப்பு அதிகரிக்கும்.
காற்றலைப் பயிற்சிகளால் உடல் பாகங்களுக்கு அதிக ரத்தம் செல்லும். அப்போது ஆக்ஸிஜன் எல்லா உறுப்புகளுக்கும் அதிகமாக கிடைக்கும். குறிப்பாக, இதயம் சீராக இயங்கும்.
நடைப்பயிற்சி, நீச்சல், சைக்கிளிங்கால் ரத்த அழுத்தம் கட்டுப்படும். கொலஸ்ட்ரால் அளவு கட்டுப்படும். சுவாசம் அதிகரிக்கும். நுரையீரலின் காற்றுக் கொள்ளளவு கூடும்.
காற்றலைப் பயிற்சிகளால் சுவாசத் திறன் மேம்படும். சிறுநீரகம், நுரையீரல், தோல் போன்றவற்றின் வழியாக உடற்கழிவுகள் விரைவில் அகற்றப்படும்.
ஆக மொத்தத்தில் இதயத்துக்கு மட்டுமல்லாமல் காற்றலைப் பயிற்சிகளால் உடலின் ஒட்டுமொத்த ஆரோக்கியமும் மேம்படும்.
ஆகவே, தினமும் ‘ஜிம்’ பயிற்சிகளை மேற்கொள்பவர்கள் நடைப்பயிற்சிக்கும் நேரம் ஒதுக்க வேண்டும். அப்போதுதான் அவர்களுக்கு இதயப் பாதுகாப்பு கிடைக்கும்.
அதேவேளை, ‘ஜிம்’ பயிற்சிகளை மேற்கொள்வதற்கு முன்னால் ஒருமுறை மருத்துவ ஆலோசனை பெற்றுக்கொள்ள வேண்டியதும் அவசியம்.