திருநெல்வேலி மாவட்டத்தில் கனமழை பெய்து வருகிறது. மழைநீர் பெருக்கெடுத்ததால் தாமிரபரணியில் வெள்ளப்பெருக்கு ஏற்பட்டுள்ளது. | தகவல்கள்: அ.அருள்தாசன் | படங்கள்: மு.லெட்சுமி அருண்

நெல்லை மாவட்டத்தில் வெள்ளிக்கிழமை காலை 8 மணி வரையிலான 24 மணி நேரத்தில் மொத்தம் 4,121 மி.மீ. மழை பதிவானது. அதிகபட்சமாக மேற்கு தொடர்ச்சி மலையில் உள்ள ஊத்து பகுதியில் 540 மி.மீ. மழை பெய்தது. 

பாபநாசம், மணிமுத்தாறு உள்ளிட்ட அணைகளில் நீர் இருப்பு பாதிக்கும் குறைவாகவே உள்ளது. கனமழையால் அணைகளுக்கு நீர்வரத்து அதிகரித்தாலும், அதிக அளவில் வெளியேற்றப்படவில்லை. அணைகளில் இருந்து மொத்தம் 1,500 கனஅடி வீதம் மட்டுமே பாசனத்துக்காக தண்ணீர் திறக்கப்பட்டுள்ளது.

அணைகளில் இருந்து பெருமளவில் தண்ணீர் திறக்கப்படாத நிலையில், காட்டாற்று வெள்ளமும், ஊர்களில் பெய்த மழை நீரும் மட்டுமே ஆங்காங்கே உள்ள கால்வாய்கள் வழியாக தாமிரபரணி ஆற்றுக்கு வந்து கொண்டிருக்கிறது. 

கொக்கிரக்குளம் தாமிரபரணி ஆற்றின் கரையோரத்தில் உள்ள மண்டபங்கள், மற்றும் தைப்பூசமண்டபங்கள் ஆற்று வெள்ளத்தில் மூழ்கின.

தாமிரபரணி ஆற்றில் வெள்ளம் கரைபுரண்டு ஓடுவதால் ஆற்றின் நடுவில் உள்ள குறுக்குத்துறை முருகன் கோவிலை மூழ்கடித்தவாறு சென்ற தண்ணீர் . மேலும் அருகில் உள்ள கோவில்களும் ஆற்றில் மூழிகியது .

இதன் காரணமாக, நெல்லை அருகேயுள்ள சுத்தமல்லி அணைக்கட்டுக்கு 60 ஆயிரம் கனஅடி தண்ணீர் வந்தது. ஆற்றில் வெள்ளத்தின் அளவு அபாய கட்டத்தை எட்டவில்லை என்ற போதிலும், தாமிரபரணி கரையோரமுள்ள பொதுமக்கள் பாதுகாப்பாக இருக்குமாறு மாவட்ட நிர்வாகம் எச்சரிக்கை விடுத்தது.

நெல்லை மாநகரப் பகுதிகளில் பல்வேறு தெருக்களில் தண்ணீர் தேங்கியது. நெல்லை சந்திப்பு பேருந்து நிலையம் பகுதியில் முழங்கால் அளவுக்கு தண்ணீர் தேங்கியது. தண்ணீரை வடியவைக்கும் பணிகளை மாவட்ட கண்காணிப்பு அலுவலர் சந்தீப்நந்தூரி பார்வையிட்டார்.

நெல்லை, தென்காசி மற்றும் தூத்துக்குடி மாவட்டங்களில் கனமழை எச்சரிக்கை காரணமாக பள்ளி, கல்லூரிகளுக்கு வெள்ளிக்கிழமை விடுமுறை அளிக்கப்பட்டிருந்தது. மனோன்மணியம் சுந்தரனார் பல்கலைக்கழக கல்லூரிகளில் நடைபெறவிருந்த செமஸ்டர் தேர்வுகளும் தள்ளிவைக்கப்பட்டன.

திருநெல்வேலி மாநகரில் பருவமழை முன்னேற்பாடு பணிகளை சரிவர மேற்கொள்ளாததால் கடந்த ஆண்டைப் போலவே தற்போதும் முக்கிய சாலைகள், கடைவீதிகள், கோயில்கள், குடியிருப்பு பகுதிகளை வெள்ளம் சூழ்ந்துள்ளது.

திருநெல்வேலியில் பருவமழை முன்னேற்பாடுகள் மேற்கொள்ளப்படுவதாக கடந்த சில மாதங்களுக்கு முன்னதாகவே அதிகாரிகள் தெரிவித்திருந்தனர். இதற்காக பல்வேறு ஆலோசனை கூட்டங்களும் நடத்தப்பட்டிருந்தன. 

ஆங்காங்கே பணிகளும் நடைபெற்றன. ஆனால் மழைநீர் ஓடைகளும், கால்வாய்களும் மராமத்து செய்யப்படாமலும், தூர்வாரப்படாமலும், ஆக்கிரமிப்புகள் அகற்றப்படாமலும் உள்ளன. 
 

இந்நிலையில், ஒருநாள் மழைக்கே திருநெல்வேலி தாக்குப்பிடிக்காமல் தாழ்வான பகுதிகளில் தண்ணீர் குளம் போல் தேங்கி மக்களின் இயல்பு வாழ்க்கையை பாதித்துள்ளது. 
 

கடந்த 2023-ம் ஆண்டு டிசம்பரில் அதிக கனமழையின் போது தண்ணீர் தேங்கிய அதே பகுதிகள் தற்போது மீண்டும் தண்ணீரில் தத்தளிக்கின்றன.

திருநெல்வேலி சந்திப்பு பழைய பேருந்து நிலையத்தை ஸ்மார்ட் சிட்டி திட்டத்தில் பல கோடி ரூபாய் செலவில் புதுப்பித்து கட்டியிருக்கும் நிலையில், தற்போதைய மழையில் பேருந்து நிலையத்தை தண்ணீர் சூழ்ந்திருக்கிறது. 

ஆய்வு என்ற பெயரில் அமைச்சரும், மக்கள் பிரதிநிதிகளும், அதிகாரிகளும் இந்த பகுதிகளை பார்வையிட்டு செல்கிறார்கள். ஆனால் நிரந்தர தீர்வுக்கு வழி காணப்படவில்லை என்று பொதுமக்கள் குற்றம் சாட்டுகிறார்கள்.