சென்னையில் இன்று (புதன்கிழமை) பகல் நேரத்தில் கனமழை கொட்டித் தீர்த்தது. | படங்கள்: அகிலா ஈஸ்வரன், ஸ்ரீநாத்

கிழக்கு திசைக்காற்று வீசத் தொடங்கிய நிலையில், புறநகர் பகுதிகளில் காலை 11.45 மணி அளவில் மழை பெய்யத் தொடங்கியது. பின்னர் மாநகர் பகுதியிலும் மழை பரவியது. பின்னர் கனமழையாக கொட்டித் தீர்த்தது.

பிற்பகல் 12 முதல் 1 மணி வரை அண்ணாநகரில் 9 செமீ, அமைந்தகரை, பெரம்பூர், கொளத்தூர் ஆகிய பகுதிகளில் தலா 6 செமீ, அம்பத்தூர், நுங்கம்பாக்கத்தில் தலா 5 செமீ மழை பதிவானது. 

இந்த கனமழை காரணமாக அண்ணாநகர், கே.கே.நகர், கிண்டி, அமைந்தகரை, கோயம்பேடு உள்ளிட்ட பல்வேறு பகுதிகளில் சாலைகளில் மழைநீர் தேங்கி, வாகனங்கள் ஊர்ந்து சென்றதால், முக்கிய சாலைகளில் கடும் போக்குவரத்து நெரிசல் ஏற்பட்டது.
 

கனமழை காரணமாக துணிக்கடைகளில் தீபாவளி விற்பனை பாதிக்கப்பட்டது. 
 

தீவுத்திடலில் பட்டாசு விற்பனையும் பாதிப்படைந்தது. 

சாலைகளில் தேங்கிய மழைநீரை வடிக்கும் பணியில் மாநகராட்சி பணியாளர்கள் ஈடுபடுத்தப்பட்டனர்.
 

சென்னையைப் பொறுத்தவரை அடுத்த 48 மணி நேரத்துக்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது என்று சென்னை வானிலை ஆய்வு மையம் தெரிவித்துள்ளது.