திருச்சி மாவட்டம் நவல்பட்டு காவல் நிலையத்தில் சிறப்பு சப் இன்ஸ்பெக்டராக பணிபுரிந்த பூமிநாதன், கடந்த 21-ம் தேதி புதுக்கோட்டை மாவட்டம் கீரனூர் அருகேயுள்ள பள்ளத்துப்பட்டியில் ஆடு திருடும் கும்பலால் கொலை செய்யப்பட்டார்.
அதன் தொடர்ச்சியாக மத்திய மண்டல ஐ.ஜி வே.பாலகிருஷ்ணன் உத்தரவின்பேரில் சரக டி.ஐ.ஜி சரவணசுந்தர் மேற்பார்வையில் ஒரு சப் இன்ஸ்பெக்டர், 3 காவலர்களைக் கொண்ட தனிப்படை அமைத்து திருச்சி, புதுக்கோட்டை, கரூர், பெரம்பலூர், அரியலூர் ஆகிய 5 மாவட்டங்களில் போலீஸாருக்கு புகார் வரப்பெற்ற ஆடு திருட்டுச் சம்பவங்கள் தொடர்பாக விசாரணை நடத்தப்பட்டது. அதன்படி, திருச்சியில் 3, புதுக்கோட்டையில் 8, கரூரில் 1 என மொத்தம் 12 வழக்குகள் பதிவு செய்யப்பட்டு 4 பேர் கைது செய்யப்பட்டனர். அவர்களிடமிருந்து 60 ஆடுகள் மீட்கப்பட்டு நீதிமன்றம் மூலம் உரியவர்களிடம் ஒப்படைக்கப்பட்டன.
இதையடுத்து சிறப்பாக செயல்பட்ட தனிப்படையினரை பாராட்டிய டி.ஐ.ஜி சரவணசுந்தர், ஆடு திருட்டில் ஈடுபடுவோரைக் கண்காணித்து உடனுக்குடன் உரிய நடவடிக்கை எடுக்க வேண்டும் என உத்தரவிட்டார்.