கிருஷ்ணகிரி மாவட்டத்தில் தொடர் மழை - மாற்றுத்திறனாளிகளுக்கான மருத்துவ முகாம் தேதி மாற்றம் :

கிருஷ்ணகிரி மாவட்டத்தில் தொடர்மழை காரணமாக நேற்று (9-ம் தேதி)முதல் 12-ம் தேதி வரை நடைபெறஇருந்த மாற்றுத்திறனாளிகளுக்கான மருத்துவ முகாம் வேறு தேதிக்கு மாற்றம் செய்யப்பட்டுள்ளது.

இதுதொடர்பாக மாவட்ட ஆட்சியர் ஜெயசந்திரபானு ரெட்டி வெளியிட்டுள்ள செய்திக்குறிப்பு:

கிருஷ்ணகிரி மாவட்ட மாற்றுத்திறனாளிகள் நல அலுவலகம், மத்திய அரசு நிறுவனத்தின் மூலம் மாற்றுத்திறனாளிகளுக்கு உதவிஉபகரணங்கள் மற்றும் மாவட்ட நிர்வாகத்தின் பல்வேறு நலத்திட்டங்களுடன் கூடிய ஒருங்கிணைந்த மருத்துவ முகாம் நேற்று (9-ம் தேதி) முதல் 12-ம் தேதி வரை நடத்தப்படுவதாக அறிவிக்கப்பட்டிருந்தது.

தற்போது பெய்துவரும் தொடர் மழையால் இந்த முகாம் நடைபெறும் தேதிகள் மாற்றம் செய்யப்பட்டுள்ளது.

அதன்படி, வரும் 16-ம் தேதி மத்தூர் அரசு ஆண்கள் மேல்நிலைப்பள்ளியிலும், 17-ம் தேதி சூளகிரி அரசு ஆண்கள் மேல்நிலைப்பள்ளியிலும், 18-ம் தேதிகாவேரிப்பட்டணம் அரசு ஆண்கள் மேல்நிலைப்பள்ளியிலும், 19-ம் தேதி ஓசூர் ஆர்.வி.அரசு ஆண்கள் மேல் நிலைப்பள்ளியிலும், 23-ம் தேதி தளி அரசு மேல்நிலைப்பள்ளியிலும், 24-ம் தேதி தேன்கனிக்கோட்டை அரசு ஆண்கள் மேல்நிலைப்பள்ளியிலும் முகாம்கள் நடைபெறுகிறது.

எனவே, மாற்றுத்திறனாளிகளுக்கான தேசிய அடையாள அட்டை, அதற்கான மருத்துவ சான்று நகல், ஆதார் அட்டை நகல், குடும்ப அட்டை நகல்,மார்பளவு புகைப்படங்களுடன் முகாம் நடைபெறும் இடங்களில் மாற்றுத்திறனாளிகள் கலந்து கொண்டு பயன்பெறலாம்.