திருப்பூர் மற்றும் சுற்றுவட்டாரப் பகுதிகளில் ஆட்கள் தேவை என்ற விளம்பர பதாகை அதிகளவு வைக்கப்பட்டு வருகிறது. இதற்கிடையே, ஓவர்லாக் தையல் தொழிலாளர்கள் தேவை என, வித்தியாசமாக வைக்கப்பட்டுள்ள விளம்பர பதாகை, சமூக வலைதளங்களில் வைரலாகி வருகிறது. திருப்பூர் - அவிநாசி சாலையில் வைக்கப்பட்டுள்ள அந்த பதாகையில், ஓவர்லாக் தையல் தொழிலாளி தேவை, ஆண்டு முழுவதும் பணிக்கு வருவோருக்கு தங்க மோதிரம் வழங்கப்படும் என குறிப்பிடப்பட்டிருந்தது. திருப்பூரில் மற்ற வேலைக்குகூட ஆட்கள் கிடைத்துவிடும். ஆனால், தையல் தொழிலாளர்களுக்கு தட்டுப்பாடு உள்ள நிலையில், தொழிலாளிகளை கவரும் வகையில் அவ்வப்போது விளம்பர பதாகைகள் வைக்கப்பட்டு வருகின்றன. அதன் ஒருபகுதியாக, இந்த விளம்பரம் வைக்கப்பட்டுள்ளதாக தையல் தொழிலாளிகள் தெரிவித்தனர்.